Read Maltese Bible with DC – IL-BIBBJA IL-KOTBA MQADDSA SALMI 89 Bible Online

SALMI 89 - Maltese Bible with DC – IL-BIBBJA IL-KOTBA MQADDSA bible

SALMI 89

¹Maskil. Ta’ Etan, l-Eżraħi.

²It-tjieba tal-Mulej irrid dejjem ngħanni; f’kull żmien ixandar fommi l-fedeltà tiegħek.

³Għax jien għedt: “Tjubitek tibqa’ sħiħa għal dejjem; bħas-smewwiet int wettaqt il-fedeltà tiegħek.”

⁴“Għamilt patt mal-magħżul tiegħi, ħlift lil David, il-qaddej tiegħi:

⁵‘Jien nagħmel li nislek jibqa’ għal dejjem, li f’kull żmien jibqa’ sħiħ it-tron tiegħek.’ ”

⁶Ifaħħru s-smewwiet għeġubijietek, Mulej, u l-fedeltà tiegħek fil-ġemgħa tal-qaddisin[162].

⁷Għax min hemm fis-sema daqs il-Mulej? Min jixbah lill-Mulej fost dawk li hemm fis-sema?

⁸Tal-biża’ Alla fil-laqgħa tal-qaddisin, kbir u tal-biża’ fuq dawk kollha ta’ madwaru.

⁹Mulej, Alla tal-eżerċti, min hu bħalek? Int qawwi, Mulej, u kollok fedeltà.

¹⁰Int taħkem fuq il-baħar imqalleb; meta jqumu l-imwieġ int trażżanhom.

¹¹Int tisħaq ’il Raħab[163] bħal midrub għall-mewt; bi driegħek setgħani tferrex l-għedewwa tiegħek.

¹²Tiegħek is-smewwiet u tiegħek l-art, id-dinja b’kulma fiha int waqqaftha.

¹³It-Tramuntana u n-Nofsinhar inti ħlaqthom; b’ismek jifirħu t-Tabor u l-Ħermon[164].

¹⁴Driegħ kollu qawwa hu driegħek, b’saħħitha idek, merfugħa lemintek.

¹⁵Fuq id-dritt u l-ġustizzja mibni t-tron tiegħek; tjieba u fedeltà jgħaddu quddiemek.

¹⁶Hieni l-poplu li jaf jgħajjat bil-ferħ, li jimxi, Mulej, fid-dawl ta’ wiċċek.

¹⁷B’ismek jithennew il-jum kollu, u bil-ġustizzja tiegħek jifirħu.

¹⁸Għax inti l-foħrija tal-qawwa tagħhom[165]; għal tjubitek nerfgħu rasna fl-għoli.

¹⁹Għax il-Mulej it-tarka tagħna; il-Qaddis ta’ Iżrael is-sultan tagħna.

²⁰Dhert fl-imgħoddi lil ħbiebek u għedtilhom: “Jien qegħedt il-kuruna fuq ras wieħed qalbieni; ħtart żagħżugħ u għollejtu fuq il-poplu.

²¹Sibt ’il David, qaddej tiegħi, biż-żejt imqaddes tiegħi dliktu;

²²tkun idi dejjem miegħu, u nsaħħu wkoll bi driegħi.

²³Ma jgħakksux l-għadu tiegħu; ma jbaxxihx il-bniedem ħażin.

²⁴Inxejjen quddiemu l-għedewwa tiegħu, u nsawwat lil min jobogħdu.

²⁵Miegħu jkunu l-fedeltà u t-tjieba tiegħi; b’ismi tissaħħaħ il-qawwa tiegħu.

²⁶Is-setgħa ta’ jdejh nifrex fuq il-baħar[166]; fuq ix-xmajjar taħkem il-leminija tiegħu.

²⁷Hu jsejjaħli: Int missieri u Alla tiegħi, fortizza u salvazzjoni tiegħi!

²⁸U jiena nagħmlu l-iben il-kbir tiegħi, l-ogħla fost is-slaten tal-art.

²⁹It-tjieba tiegħi nżommha fuqu għal dejjem, u l-patt tiegħi miegħu jibqa’ sħiħ.

³⁰Nagħmel li nislu jibqa’ għal dejjem; it-tron tiegħu jkun bħall-jiem tas-sema[167].

³¹Jekk uliedu jħallu l-liġi tiegħi, u ma jimxux skont il-preċetti tiegħi;

³²jekk huma jiksru l-liġijiet tiegħi, u ma jħarsux il-kmandamenti tiegħi,

³³jien nikkastiga ħtijiethom bil-virga, u bis-swat il-ħażen tagħhom.

³⁴Iżda ma nwarrabx tjubiti minnu; ma niksirx il-kelma li tajtu.

³⁵Ma nonqosx mill-patt tiegħi; ma nerġax lura minn kelmti.

³⁶Ħlift bi qdusiti darba għal dejjem, żgur li b’David ma nqarraqx.

³⁷Nislu għal dejjem jibqa’; it-tron tiegħu bħax-xemx quddiemi.

³⁸Bħall-qamar jibqa’ għal dejjem; it-tron tiegħu aktar sod mis-sema.”

³⁹Imma int warrabt is-sultan midluk tiegħek; għadabt għalih u begħedtu minnek.

⁴⁰Ħassart il-patt mal-qaddej tiegħek; kasbart mal-art il-kuruna tiegħu.

⁴¹Ġarraft il-ħitan tiegħu kollha; għamilt ħerba mis-swar tiegħu.

⁴²Kull min jgħaddi minn ħdejh jisirqu; sar iż-żebliħ tal-ġirien tiegħu.

⁴³Qajjimt il-leminija tal-għedewwa tiegħu, ferraħt ’il dawk kollha li huma kontrih.

⁴⁴Reġġajtlu lura s-sejf misnun tiegħu; ma waqaftx miegħu fit-taqbida.

⁴⁵Kissirtlu x-xettru ta’ ġieħu; mal-art tfajtlu t-tron tiegħu.

⁴⁶Qassartlu ż-żmien ta’ żgħożitu, u ksejtu bil-mistħija.

⁴⁷Mulej, se tibqa’ għal dejjem tinħeba minna? Se jibqa’ ħuġġieġa nar l-għadab tiegħek?

⁴⁸Ftakar li ftit huma jiem ħajti. Għal daqshekk int ħlaqtu l-bniedem?

⁴⁹Min hu li jgħix u ma jarax il-mewt? Min jeħlisha mis-setgħa tal-imwiet?

⁵⁰Fejn hi, Sidi, it-tjieba tiegħek ta’ dari? Fejn hi l-fedeltà li biha ħlift lil David?

⁵¹Ftakar, Sidi, kif inhu mkasbar il-qaddej tiegħek; kif qed nilqa’ ġo fija ż-żebliħ tal-popli,

⁵²iż-żebliħ li qed jagħmlulna l-għedewwa tiegħek, Mulej, li qed ikasbru kull ħjiel tas-sultan midluk tiegħek.

⁵³Imbierek il-Mulej[168] għal dejjem! Ammen! Ammen!