Read Maltese Bible with DC – IL-BIBBJA IL-KOTBA MQADDSA SALMI 9 Bible Online

SALMI 9 - Maltese Bible with DC – IL-BIBBJA IL-KOTBA MQADDSA bible

SALMI 9

¹Għall-mexxej tal-kor[12]. Fuq l-għanja “Mut-labben”. Salm ta’ David.

²Infaħħrek, Mulej, b’qalbi kollha; inxandar għeġubijietek kollha!

³Nifraħ u nithenna bik; ngħanni lil ismek, int Alla l-għoli.

⁴Xħin jiġu lura l-għedewwa tiegħi, jitfixklu u jgħibu quddiemek.

⁵Għax int ħadt f’idejk id-dritt u l-kawża tiegħi, ta’ mħallef ġust qgħadt fuq it-tron tiegħek.

⁶Ċanfart il-ġnus[13] u qridt il-ħżiena; ħassart isimhom għal dejjem ta’ dejjem.

⁷Intemmu l-għedewwa mħarbtin għal dejjem; bliethom qridtilhom, u tifkirithom intilfet magħhom.

⁸Imma l-Mulej isaltan għal dejjem, iwaqqaf għall-ħaqq it-tron tiegħu.

⁹Hu jagħmel ħaqq mid-dinja bil-ġustizzja, jiġġudika l-popli bis-sewwa.

¹⁰Ikun il-Mulej kenn għal min hu mgħakkes, kenn għalih fi żmien id-dwejjaq.

¹¹Fik jittama min jagħraf lil ismek, għax int, Mulej, ma titlaqx ’il min ifittxek.

¹²Għannu lill-Mulej li joqgħod f’Sijon, xandru fost il-popli l-għemejjel tiegħu.

¹³Hu, li jitħallas mid-demm, jiftakar fihom, ma jinsiex għajjat l-imsejknin.

¹⁴Ħenn għalija, Mulej; ara n-niket tiegħi; inti rfajtni u ħriġtni minn bibien il-mewt;

¹⁵biex inxandar tifħirek kollu f’bibien il-belt ta’ Sijon[14]; biex nifraħ minħabba l-ħelsien tiegħek.

¹⁶Waqgħu l-ġnus fil-ħofra li ħaffru; fix-xibka li ħbew inqabad riġilhom.

¹⁷Għarraf il-Mulej lilu nnifsu u għamel il-ħaqq, b’għemil idejh inqabad il-ħażin.

¹⁸Jinżlu l-ħżiena f’qiegħ l-art, il-ġnus kollha li jinsew ’l Alla.

¹⁹Għax l-imsejken ma jintesiex għal dejjem, it-tama tal-fqajrin ma tkunx għal dejjem fiergħa.

²⁰Qum, Mulej! Ma jirbaħx il-bniedem! Ħa jidhru l-ġnus għall-ħaqq quddiemek.

²¹Itfa’, Mulej, it-twerwir fuqhom, ħa jagħrfu l-ġnus li bnedmin huma.