Read Maltese Bible with DC – IL-BIBBJA IL-KOTBA MQADDSA SALMI 90 Bible Online

SALMI 90 - Maltese Bible with DC – IL-BIBBJA IL-KOTBA MQADDSA bible

SALMI 90

¹Talba ta’ Mosè, il-bniedem ta’ Alla. Mulej, int kont għalina kenn minn nisel għal nisel.

²Qabel ma twieldu l-muntanji, qabel ma tnisslu l-art u d-dinja, minn dejjem ta’ dejjem int, o Alla!

³Int traġġa’ l-bnedmin lejn it-trab, u tgħidilhom[169]: “Erġgħu lura, intom bnedmin!”

⁴Elf sena huma għalik bħal jum ta’ lbieraħ li għadda, jew bħal sahra tal-lejl[170].

⁵Int taħsadhom, u jsiru bħal ħolma. Huma bħall-ħaxix[171] li jinbet filgħodu;

⁶filgħodu jwarrad u jħaddar, filgħaxija jidbiel u jinxef.

⁷Ninsabu mifnija bil-qilla tiegħek, mibluha minħabba l-għadab tiegħek.

⁸Int ġibt quddiem għajnejk ħtijietna, dnubietna l-moħbija fid-dawl ta’ wiċċek.

⁹Jiemna kollha jgħibu minħabba qilltek, jintemmu bħal tnehida s-snin ta’ ħajjitna.

¹⁰Żmien ħajjitna hu b’kollox sebgħin sena; l-iżjed tmenin, jekk inkunu f’saħħitna; u l-biċċa l-kbira taħbit u niket; malajr jgħaddu, u aħna mmorru magħhom.

¹¹Min jista’ jifhem il-qawwa ta’ qilltek? Min jista’ jqis il-biża’ ta’ għadbek?

¹²Għalhekk għallimna ngħoddu jiem ħajjitna, sabiex aħna nimxu bil-għaqal.

¹³Dur lejna, Mulej! Kemm se ddum? Ħenn għall-qaddejja tiegħek.

¹⁴Imliena kmieni bit-tjieba tiegħek, biex nifirħu u nithennew ħajjitna kollha.

¹⁵Ferraħna daqs kemm għakkistna, għas-snin li fihom rajna l-ħsara.

¹⁶Ħa jidher għemilek quddiem il-qaddejja tiegħek, u l-kobor tiegħek quddiem uliedhom.

¹⁷Ħa tkun fuqna l-grazzja ta’ Alla Sidna! Wettqilna inti x-xogħol ta’ jdejna, wettaq, iva, xogħol idejna.