Read Maltese Bible with DC – IL-BIBBJA IL-KOTBA MQADDSA SALMI 94 Bible Online

SALMI 94 - Maltese Bible with DC – IL-BIBBJA IL-KOTBA MQADDSA bible

SALMI 94

¹Mulej, Alla li taf titħallas[177], Alla li taf titħallas, tfaċċa!

²Qum, imħallef tad-dinja, roddilhom li ħaqqhom lill-kburin.

³Kemm se jdumu l-ħżiena, Mulej, kemm se jdumu l-ħżiena jifirħu?

⁴Kliem kburi joħroġ minn fommhom; kull min jagħmel il-ħażen jiftaħar.

⁵Huma jkasbru, Mulej, lill-poplu tiegħek, u jgħakksu lill-poplu ta’ wirtek.

⁶Joqtlu l-armla u l-barrani, u l-mewt jagħtu lill-iltiema;

⁷u jgħidu: “Ma jarax il-Mulej; ma jintebaħx Alla ta’ Ġakobb.”

⁸Ifhmuha, intom nies boloh fost il-poplu! Nies bla moħħ, meta se tintebħu?

⁹Forsi min għamel il-widnejn ma jismax? Jew min sawwar l-għajnejn ma jarax?

¹⁰Taħsbu li min iwiddeb lill-ġnus ma jrażżanx? Jew m’għandux għerf min jgħallem lill-bniedem?

¹¹Jagħraf il-Mulej il-ħsibijiet tal-bniedem, u jaf li mhumiex ħlief frugħa.

¹²Hieni l-bniedem li int twiddbu, Mulej, li tgħallmu l-liġi tiegħek,

¹³biex isserrħu f’jiem l-għawġ, sa ma jitħaffer il-qabar għall-ħati.

¹⁴Għax il-Mulej ma jitlaqx il-poplu tiegħu, ma jħallix il-poplu, il-wirt tiegħu.

¹⁵Għax il-ħaqq jerġa’ jsir bil-ġustizzja, u fuqu jimxu dawk kollha ta’ qalb safja.

¹⁶Min se jaqbeż għalija kontra l-ħżiena? Min se jżomm miegħi kontra min jagħmel il-ħażen?

¹⁷Li kieku l-Mulej ma tanix l-għajnuna, għal ftit ma dħaltx fis-skiet tal-mewt.

¹⁸Biżżejjed ngħid: “Qiegħed jiżloq riġli,” biex tjubitek, Mulej, tweżinni.

¹⁹Meta joktor l-hemm ġo qalbi, il-faraġ tiegħek ihennili ruħi.

²⁰Jistgħu mħallfin ħżiena jissieħbu miegħek, li jagħmlu l-qerq taħt il-libsa tal-liġi?

²¹Jiftiehmu bejniethom kontra l-ħajja tal-ġust, u jikkundannaw in-nies bla ħtija.

²²Iżda l-Mulej hu fortizza għalija, u Alla tiegħi l-blata tal-kenn tiegħi.

²³Hu jdawwar għal fuqhom ħżunithom, għall-ħażen tagħhom jeqridhom; jeqridhom il-Mulej Alla tagħna!