Read Maltese Bible with DC – IL-BIBBJA IL-KOTBA MQADDSA SALMI 96 Bible Online

SALMI 96 - Maltese Bible with DC – IL-BIBBJA IL-KOTBA MQADDSA bible

SALMI 96

¹Għannu lill-Mulej għanja ġdida; għannu lill-Mulej fl-art kollha!

²Għannu lill-Mulej, bierku ismu! Ħabbru minn jum għal ieħor is-salvazzjoni tiegħu.

³Xandru fost il-ġnus is-sebħ tiegħu, fost il-popli kollha l-għeġubijiet tiegħu.

⁴Għax kbir il-Mulej, ta’ min ifaħħru ħafna, tal-biża’ aktar mill-allat kollha.

⁵Għax kollha frugħa l-allat tal-popli; Jaħweh hu li għamel is-smewwiet!

⁶Ġmiel u sebħ huma quddiemu, qawwa u sbuħija fis-santwarju tiegħu.

⁷Agħtu lill-Mulej, familji tal-popli, agħtu lill-Mulej sebħ u qawwa;

⁸agħtu lill-Mulej is-sebħ ta’ ismu! Ġibulu l-offerti, u idħlu fil-btieħi tat-tempju tiegħu;

⁹inxteħtu quddiem il-Mulej b’tiżjin qaddis; triegħdu quddiemu, nies kollha tal-art!

¹⁰Għidu fost il-ġnus: “Il-Mulej isaltan!” Hu jżomm sħiħa d-dinja biex qatt ma titħarrek; hu li jiġġudika l-popli bis-sewwa.

¹¹Ħa jifirħu s-smewwiet u tithenna l-art, ħa jħabbat il-baħar u kulma fih,

¹²ħa jifraħ ir-raba’ u kulma fih, u jgħannu bil-ferħ is-siġar kollha tal-bosk

¹³quddiem il-Mulej, għax ġej, għax ġej biex jagħmel ħaqq mill-art. Hu jagħmel ħaqq mid-dinja bil-ġustizzja, u mill-popli bis-sewwa tiegħu.