Read Maltese Bible with DC – IL-BIBBJA IL-KOTBA MQADDSA PROVERBJI 10 Bible Online

PROVERBJI 10 - Maltese Bible with DC – IL-BIBBJA IL-KOTBA MQADDSA bible

PROVERBJI 10

¹Il-proverbji ta’ Salamun: Iben għaref iferraħ lil missieru, iben iblah inikket ’l ommu.

²Ma fihx qligħ l-għana bid-dnewwa, mill-mewt jinħeles min jimxi bis-sewwa.

³Ma jħallix il-Mulej il-ġust bil-ġuħ, iżda jġib fix-xejn xewqat il-ħżiena.

⁴Id l-għażżien iġġib fuqu l-faqar, imma id il-bieżel iġġiblu l-għana.

⁵Bil-għaqal hu min jaħżen fis-sajf, imma għajb għalih min jorqod fil-ħsad.

⁶Barkiet jinżlu fuq ras il-ġust, imma fomm il-ħżiena jaħbi l-vjolenza.

⁷It-tifkira tal-ġust titbierek, imma isem il-ħżiena jitħassar.

⁸Min hu tassew għaref jilqa’ l-kmandamenti, iżda min hu iblah fi kliemu jiġi fil-għali.

⁹Min jimxi dritt, jimxi sod, iżda min jgħawweġ triqatu jinqabad.

¹⁰Min jagħlaq għajnejh għall-ħażen, iġib l-inkwiet, iżda min iwiddeb fil-beraħ, iġib is-sliem.

¹¹Fomm il-ġust hu għajn tal-ħajja, imma fomm il-ħżiena jaħbi d-dnewwa.

¹²Il-mibegħda tqanqal il-ġlied, imma l-imħabba tgħatti kull ħtija.

¹³L-għerf jinsab fuq fomm min jifhem, imma l-bastun għal dahar min hu bla moħħ.

¹⁴In-nies bil-għaqal jaħżnu l-għerf, imma kliem l-iblah iqarreb il-qerda.

¹⁵Ġid l-għani hu l-belt qawwija tiegħu, faqar il-foqra hu l-qerda tagħhom.

¹⁶Xogħol il-ġust iwassal għall-ħajja, qligħ il-ħażen jintemm fid-dnub.

¹⁷Min jilqa’ t-tagħlim, hu fi triq il-ħajja, iżda min iwarrab it-twiddib, jitlef it-triq.

¹⁸Min jgħid il-gideb jaħbi l-mibegħda, min iqassas fuq l-oħrajn hu iblah.

¹⁹Il-kliem żejjed mhux nieqes mill-ħtija; meqjus fi kliemu min hu bil-għaqal.

²⁰Ilsien il-ġust fidda magħżula; moħħ il-ħżiena ftit li xejn jiswa.

²¹Xufftejn il-ġust jgħallmu lil ħafna, imma l-boloh jintemmu għax bla moħħ.

²²Il-barka tal-Mulej iġġib l-għana, u xejn ma jżid magħha t-taħbit tagħna.

²³Il-gost tiegħu l-iblah jagħmel il-ħażen, imma l-hena tal-għaref li jimxi bil-għaqal.

²⁴Dak li minnu l-ħażin jibża’, jiġi fuqu, imma tinqatgħalhom xewqithom lit-tajbin.

²⁵Tgħaddi t-tempesta, u jgħib il-ħażin, imma l-ġust jibqa’ fis-sod għal dejjem.

²⁶Bħall-ħall għas-snien u bħad-duħħan għall-għajnejn, hekk hu l-għażżien għal min jibagħtu jaqdih.

²⁷Il-biża’ tal-Mulej ikattar l-għomor, imma l-ħżiena għomorhom qasir.

²⁸It-tajbin jistennew u jithennew, imma l-ħżiena jittamaw għalxejn.

²⁹Il-Mulej hu sur għal min jimxi sewwa, imma hu qerda għal min jagħmel il-ħażen.

³⁰Il-bniedem ġust qatt ma jitħarrek, imma l-ħżiena ma jdumux fuq l-art.

³¹Minn fomm il-ġust joħroġ l-għerf, imma l-ilsien qarrieq jinqata’ barra.

³²Fomm il-ġust jgħid dak li jingħoġob, imma fomm il-ħżiena jitkellem bil-qerq.