Read Maltese Bible with DC – IL-BIBBJA IL-KOTBA MQADDSA PROVERBJI 13 Bible Online

PROVERBJI 13 - Maltese Bible with DC – IL-BIBBJA IL-KOTBA MQADDSA bible

PROVERBJI 13

¹Iben bil-għaqal jisma’ tagħlim missieru, imma l-insolenti ma joqgħodx għaċ-ċanfir.

²Min jagħmel il-ġid bi kliemu, ġid ikollu, imma ħsieb il-qarrieq iwassal għall-vjolenza.

³Min jgħasses kliemu jħares ħajtu, min jgħid wisq jiġi fl-għali.

⁴Ix-xewqa tal-għażżien tibqa’ bla temma, imma l-beżlin ikollhom bix-xaba’.

⁵Min hu ġust jobgħod il-gideb, il-ħażin jiżra’ l-għajb u l-mistħija.

⁶Min jimxi bis-sewwa jitħares mis-sewwa, imma l-ħażin bi ħżunitu jiġġarraf.

⁷Hawn min jagħmilha ta’ għani u m’għandu xejn; u hawn min jagħmilha ta’ fqir u għandu ħafna.

⁸L-għani b’ġidu jifdi lilu nnifsu, imma l-fqir m’għandux biex jinfeda.

⁹Dawl il-ġust jiddi bil-qawwa, imma jintefa musbieħ il-ħżiena.

¹⁰Min hu moħħu ħafif iġib il-ġlied bi kburitu, min jieħu l-parir isib l-għerf.

¹¹Il-ġid miksub ta’ malajr, malajr jinħela, imma min jiġma’ ftit ftit, ikattar ġidu.

¹²It-tama mtawla tmarrad il-qalb, imma xewqa maqtugħa hi bħal siġra tal-ħajja.

¹³Min iwarrab kelma tajba jgħarraq lilu nnifsu, min iweġġaħ il-kmand ikollu ħlas tajjeb.

¹⁴Tagħlim l-għaref hu għajn il-ħajja għal min irid jeħles mix-xibka tal-mewt.

¹⁵Min hu bil-għaqal jirbaħ l-imħabba, min jimxi bil-qerq jiġġarraf.

¹⁶L-għaqli jagħmel kollox bi ħsieb, imma l-iblah juri fil-beraħ bluhitu.

¹⁷Ambaxxatur ħażin jaqla’ l-inkwiet, messaġġier tajjeb iġib il-kwiet.

¹⁸Faqar u għajb fuq min iwarrab it-tagħlim, imma ġieħ ikollu min jilqa’ t-twiddib.

¹⁹Xewqa maqtugħa tferraħ il-qalb; il-boloh ma jħobbux jitbiegħdu mill-ħażin.

²⁰Min jagħmilha mal-għaref, isir għaref, min imur mal-boloh, jaqa’ fl-hemm.

²¹Il-midinbin riżqhom ħażin, u l-ġusti jitħallsu bil-ġid.

²²Ġid it-tajjeb jgħaddi b’wirt għal ulied uliedu, imma ġid il-midneb jirtuh il-ġusti.

²³L-art mhix maħduma tista’ tgħajjex lill-fqir, imma dan ma jsirx minħabba l-inġustizzja.

²⁴Min iżomm lura l-bastun jobgħod lil ibnu, imma min iħobbu jieħu ħsieb iwiddbu.

²⁵Il-ġust jiekol u jixba’, imma l-ħżiena jibqgħu bil-ġuħ.