Read Maltese Bible with DC – IL-BIBBJA IL-KOTBA MQADDSA PROVERBJI 14 Bible Online

PROVERBJI 14 - Maltese Bible with DC – IL-BIBBJA IL-KOTBA MQADDSA bible

PROVERBJI 14

¹Għerf il-mara jibnilha darha u bluhitha b’idejha ġġarrafha.

²Min jimxi bis-sewwa għandu l-biża’ tal-Mulej, min jimxi bl-imgħawweġ jistmerru.

³Kliem l-iblah hu bastun għal dahru, imma xufftejn l-għorrief il-ħarsien tagħhom.

⁴Fejn m’hemmx il-baqar, m’hemmx il-qamħ; b’saħħet il-gendus jinkisbu l-uċuħ tajba.

⁵Xhud tajjeb ma jgħidx il-falz, imma xhud qarrieq gideb jgħid.

⁶Għalxejn l-insolenti jfittex l-għerf, imma ħafif it-tagħlim għal min hu bil-għaqal.

⁷Tagħmilhiex ma’ min hu iblah, għax ma titgħallimx l-għerf minn fommu.

⁸B’għerfu l-għaqli jsib it-triq it-tajba, imma bluhiet il-boloh ħażin tmexxihom.

⁹Il-boloh jibqgħu fil-ħtija, imma t-tajbin ikollhom l-għaxqa ta’ Alla.

¹⁰Qalb il-bniedem tagħraf l-imrar tagħha, u ħadd barra minnha ma jissieħeb fil-ferħ tagħha.

¹¹Dar il-ħżiena tiġġarraf, imma l-għamara tat-tajbin tiġi ’l quddiem.

¹²Xi ħadd jista’ jaħseb li triqtu dritta, iżda mbagħad tmiemha jwassal għall-mewt.

¹³Imqar fid-daħk titnikket il-qalb, u l-ferħ jintemm fin-niket.

¹⁴Il-ħażin jixba’ bi frott għemilu, u t-tajjeb jiekol minn għemejjel idejh.

¹⁵Min hu nieqes minn moħħu jemmen kollox, min moħħu jilħaqlu jara sewwa qabel jemmen.

¹⁶L-għaref jaħsibha sewwa u jitbiegħed mid-deni, imma l-iblah jibqa’ għaddej moħħu mistrieħ.

¹⁷Min hu bla sabar bluhat jagħmel, min hu tal-ħsieb jaf jistenna.

¹⁸Il-boloh bluhat jirtu, imma l-għaqlin jiżżejnu bl-għerf.

¹⁹Il-ħżiena jbaxxu rashom quddiem it-tajbin, u jitbaxxew il-midinbin wara bieb il-ġusti.

²⁰Lill-fqir lanqas qrabatu ma jriduh, imma l-għani għandu ħafna ħbieb.

²¹Ħażin jagħmel min imaqdar lil għajru, imma hieni hu min iħenn għall-fqir.

²²Min jagħmel id-deni, mhux żbalji jagħmel? Min jagħmel il-ġid għandu t-tjieba u l-fedeltà.

²³Kull xogħol fih il-qligħ, imma l-kliem biss faqar iġib.

²⁴L-għaqal hu ġieħ l-għorrief, u l-bluha tiżjin il-boloh.

²⁵Min jixhed is-sewwa jsalva l-ħajja, imma l-giddieb hu traditur.

²⁶Tama qawwija jkollu min għandu l-biża’ tal-Mulej, u wliedu wkoll isibu l-kenn.

²⁷Il-biża’ tal-Mulej hu għajn tal-ħajja, bih wieħed jeħles mix-xibka tal-mewt.

²⁸Kbir hu s-sultan li għandu poplu kbir sultan bla poplu ma jiswa għal xejn.

²⁹Min għandu s-sabar jimxi b’għaqal kbir, min jisbel malajr bluhat kbar jagħmel.

³⁰Mistrieħ il-moħħ hu ħajja għall-ġisem, imma l-għira tħassarlu l-għadam.

³¹Min jgħakkes il-fqir imaqdar lil min ħalqu, imma min iħenn għall-imsejken iweġġħu.

³²Il-ħażin jiġġarraf bi ħżunitu, it-tajjeb jistkenn fi tjubitu.

³³L-għerf jgħammar f’moħħ min hu bil-għaqal, imma ma ssibux f’qalb il-boloh.

³⁴Is-sewwa jkabbar ġieħ il-poplu, imma d-dnub iwaqqgħu fl-għajb.

³⁵Is-sultan jinġibed lejn il-qaddej bil-għaqal, imma jistmerr il-qaddej bla ħila.