Read Maltese Bible with DC – IL-BIBBJA IL-KOTBA MQADDSA PROVERBJI 15 Bible Online

PROVERBJI 15 - Maltese Bible with DC – IL-BIBBJA IL-KOTBA MQADDSA bible

PROVERBJI 15

¹Tweġiba ħelwa ttaffi l-korla, kelma iebsa tqajjem l-għadab.

²Ilsien l-għorrief ixerred it-tagħlim; fomm il-boloh iferragħ il-bluha.

³Kullimkien iħarsu għajnejn il-Mulej, jgħassu fuq il-ħżiena u fuq it-tajbin.

⁴Ilsien ħelu bħal siġra tal-ħajja, imma lsien ħażin imewwet il-qalb.

⁵L-iblah jistmell tagħlim missieru; bil-għaqal hu min jaf jilqa’ t-twiddib.

⁶F’dar il-ġust hemm ġid kbir, imma qligħ l-inġust iġib l-għawġ.

⁷Xufftejn l-għorrief ixerrdu t-tagħlim; minn qalb il-boloh joħroġ il-qerq.

⁸Il-Mulej jistkerrah is-sagrifiċċju tal-ħżiena, imma jitgħaxxaq bit-talba tat-tajbin.

⁹Il-Mulej jistkerrah l-imġiba tal-ħżiena, imma jħobb ’il min ifittex is-sewwa.

¹⁰Tbeżbiża ħarxa jrid min joħroġ barra mit-triq; min jobgħod it-twiddib il-mewt isib.

¹¹Qiegħ l-Art u l-Imwiet quddiem għajnejn il-Mulej; kemm aktar qlub il-bnedmin.

¹²L-insolenti ma jħobbx lil min iwiddbu, u ma jmurx għand l-għorrief.

¹³Il-qalb ferħana tagħmel il-wiċċ daħkan, imma l-qalb imnikkta tmewwet ir-ruħ.

¹⁴Min hu bil-għaqal ifittex it-tagħlim, imma l-boloh jirgħu fil-bluha.

¹⁵L-imsejken għomru kollu fid-dwejjaq, imma qalb il-hieni dejjem festa.

¹⁶Aħjar ikollok il-ftit bil-biża’ tal-Mulej, milli jkollok teżor kbir bl-inkwiet tiegħu.

¹⁷Aħjar platt ħaxix mogħti bl-imħabba, minn gendus smin bil-mibegħda miegħu.

¹⁸Min jagħdab ħafna jġib l-inkwiet, min jimxi bis-sabar isikket il-ġlied.

¹⁹Triq l-għażżien hi kollha xewk, imma l-mogħdija tal-bieżla hi triq tajba.

²⁰Iben bil-għaqal iferraħ ’il missieru, imma l-iblah ikasbar ’l ommu.

²¹Min hu bla moħħ jifraħ bil-bluha; min hu bil-għaqal jimxi sewwa.

²²Tifsil ta’ xogħol bla ħsieb jisfa’ fix-xejn, imma bil-pariri ta’ ħafna jmur tajjeb.

²³Jifraħ min jaf jagħti tweġiba tajba; kelma f’waqtha, kemm hi sabiħa!

²⁴Triq l-għaref tieħdu ’l fuq lejn il-ħajja, u tbiegħdu mill-mewt ta’ taħt l-art.

²⁵Il-Mulej iġarraf dar il-kburin, imma jżomm sħaħ ħitan l-armla.

²⁶Il-Mulej jistkerrah ħsibijiet il-ħżiena, imma jitgħaxxaq bi kliem it-tajbin.

²⁷Ir-rgħib għall-qligħ inkwiet f’daru jġib, imma min jobgħod it-tixħim jgħix aħjar.

²⁸Moħħ il-ġust jaħsibha qabel iwieġeb, imma lsien il-ħżiena jinfexx fil-ħażen.

²⁹Il-Mulej jitbiegħed mill-ħżiena, imma jisma’ talb il-ġusti.

³⁰Wiċċ imdawwal iferraħ il-qalb, u aħbar tajba ssaħħaħ l-għadam.

³¹Min jilqa’ t-twiddib għall-ġid, jagħmilha mal-għorrief.

³²Min iwarrab it-tagħlim imur kontra tiegħu nnifsu, imma min jisma’ t-twiddib jikseb id-dehen.

³³Il-biża’ tal-Mulej hu tagħlim l-għerf; u biex tasal għall-ġieħ, trid tiċċekken.