Read Maltese Bible with DC – IL-BIBBJA IL-KOTBA MQADDSA PROVERBJI 17 Bible Online

PROVERBJI 17 - Maltese Bible with DC – IL-BIBBJA IL-KOTBA MQADDSA bible

PROVERBJI 17

¹Aħjar loqma ħobż niexfa bis-sliem, minn dar mimlija bl-ikel u l-ġlied.

²Qaddej bil-għaqal[19] jikkmanda iben bla ġieħ, u jaqsam il-wirt mal-aħwa.

³Il-fidda tissaffa fil-griġjol u d-deheb fin-nar, imma qlub il-bnedmin iġarrabhom il-Mulej.

⁴Il-ħażin iħobb jisma’ kliem il-qerq, u l-giddieb jagħti widen għall-ilsien ħażin.

⁵Min jidħak bil-fqir ikasbar lil min ħalqu; min jifraħ bid-deni jħallas għalih.

⁶Ulied l-ulied huma l-ġieħ tax-xjuħ, u l-kburija tal-ulied missirijiethom.

⁷Il-kliem sabiħ ma jixraqx lil min hu iblah; kemm aktar ma jixraqx il-gideb lil min hu kbir.

⁸Rigal min ixaħħam bħal seħer fl-għajnejn, bih wieħed jirnexxi kull fejn imur.

⁹Min jistor il-ħtija jżomm l-imħabba, imma min itenniha jikser il-ħbiberija.

¹⁰Ċanfira waħda tolqot aktar lill-għaqli, minn mitt daqqa lill-iblah.

¹¹Il-ħażin iqum kontra min għandu s-setgħa, imma mbagħad messaġġier aħrax jintbagħat għalih.

¹²Aħjar tħabbat wiċċek ma’ orsa li ħadulha l-frieħ, milli mal-iblah fis-siegħa ta’ bluhatu.

¹³Min irodd id-deni għall-ġid, id-deni ma jwarrabx minn daru.

¹⁴Il-bidu tal-ġlied bħal żbroff tal-ilma, warrab qabel tibda xi ġlieda.

¹⁵Kemm min jeħles il-ħażin u kemm min jikkundanna l-ġust, it-tnejn jistmellhom il-Mulej.

¹⁶X’jiswew il-flus f’id l-iblah? Se jixtri bihom l-għerf, jekk m’għandux moħħ?

¹⁷Il-ħabib iħobbok kull ħin, bħal ħuk imwieled għal żmien l-hemm.

¹⁸Min hu bla moħħ jidħol garanti, u jagħmel tajjeb għal ħaddieħor.

¹⁹Min iħobb il-ġlied iħobb id-dnub; min jagħmel bieb għoli jistieden it-tiġrif.

²⁰Il-qalb qarrieqa ma ssibx kwiet, u l-ilsien ħażin jiġi fl-għali.

²¹Missier l-iblah għali jkollu, m’għandux biex jifraħ b’iben bla moħħ.

²²Qalb ferħana tagħti s-saħħa, ruħ imnikkta tmewwet il-ġisem.

²³Il-ħażin jieħu r-rigali bil-moħbi, biex ma jaqtax il-ħaqq skont is-sewwa.

²⁴L-għaqli jżomm l-għerf quddiem għajnejh, imma l-iblah idawwar għajnejh kullimkien.

²⁵Iben iblah hu l-għali ta’ missieru, u l-imrar ta’ ommu li wilditu.

²⁶Mhux sewwa tikkastiga ’l min hu bla ħtija; ħażin li ssawwat nies ta’ ġieħ.

²⁷Min għandu l-għerf kliemu meqjus, min għandu l-għaqal moħħu kalm.

²⁸Lill-iblah ukoll, jekk jiskot, jaħsbuh għaref, u b’għaqli jgħodduh, jekk iżomm fommu sieket.