Read Maltese Bible with DC – IL-BIBBJA IL-KOTBA MQADDSA PROVERBJI 18 Bible Online

PROVERBJI 18 - Maltese Bible with DC – IL-BIBBJA IL-KOTBA MQADDSA bible

PROVERBJI 18

¹Min irid jinfired mill-oħrajn jara x’jaqla’, u għal kull xejn jiġġieled.

²L-iblah ma jħobbx jimxi bl-għaqal, irid biss juri fehemtu.

³Il-ħażen iġib it-tmaqdir miegħu; jiġi l-għajb fuq min jitlef ġieħu.

⁴Kliem l-għaref bħal ilma fond, għajn l-għerf nixxiegħa ta’ ilma ħaj.

⁵Mhux sewwa raġun tagħti lill-ħażin, biex tagħti tort lill-ġust fil-ħaqq.

⁶Kliem l-iblah jaqla’ l-inkwiet, kliem fommu jġib il-ġlied.

⁷Bi kliemu l-iblah jiġġarraf, fommu xibka għalih innifsu.

⁸Kliem ix-xewwiex bħal ikel bnin, li jinżel sa qiegħ l-istonku.

⁹Min jitnikker fuq xogħlu, jiġi ħu dak li jġarraf.

¹⁰Isem il-Mulej hu torri qawwi[20]; fih jistkenn il-ġust b’moħħu mistrieħ.

¹¹Ġid l-għani hu belt qawwija għalih; jistħajlu sur għoli madwaru.

¹²Il-bniedem jitkabbar, sakemm ma jaqax, biex tasal għall-ġieħ, trid tiċċekken.

¹³Min iwieġeb qabel ma jisma’, bluha jagħmel u mistħija jkollu.

¹⁴Min hu ta’ kuraġġ jiflaħ għall-mard, imma min qalbu maqtugħa, biex jintrefa’?

¹⁵Moħħ miftuħ jikseb l-għerf; l-għorrief jagħtu widen għat-tagħlim.

¹⁶Min jagħti r-rigali jiftaħ it-triq quddiemu, u jibqa’ dieħel sa quddiem il-kbar.

¹⁷Min jitkellem l-ewwel taħsbu għandu raġun, sakemm ħaddieħor jgħarblu u jistaqsih.

¹⁸Bix-xorti twaqqaf il-ġlied, u taqta’ min għandu raġun f’tilwima kbira.

¹⁹Ħuk imweġġa’ jsir għalik bħal belt qawwija, u l-ġlied iebes daqs bieb ta’ fortizza.

²⁰Bi frott kliemu jixba’ l-bniedem, bi kliem fommu jaqla’ x’jiekol.

²¹Fis-setgħa ta’ lsien il-mewt u l-ħajja, min jinqeda bih tajjeb jiekol minn frottu.

²²Min isib mara jsib il-ġid, u jikseb il-barka tal-Mulej.

²³Il-fqir jitlob bil-ħniena, u l-għani jwieġeb bil-herra.

²⁴Hemm ħbieb tal-isem biss; ħabib tassew jintrabat miegħek aktar minn ħuk.