Read Maltese Bible with DC – IL-BIBBJA IL-KOTBA MQADDSA PROVERBJI 19 Bible Online

PROVERBJI 19 - Maltese Bible with DC – IL-BIBBJA IL-KOTBA MQADDSA bible

PROVERBJI 19

¹Aħjar fqir li jgħix bla ħtija, minn wieħed għani li jqarraq bi kliemu.

²Mhix tajba l-ħeġġa mingħajr il-ħsieb; u min jimxi bl-għaġla jitlef triqtu.

³Bi bluhatu l-bniedem jgħarraq ħajtu, u mbagħad jeħodha kontra l-Mulej.

⁴L-għana jiġbed ħafna ħbieb, imma l-fqir sa ħabibu jitilqu.

⁵Min jixhed il-falz ma jibqax bla kastig, u min ilissen il-gideb ma jeħlishiex.

⁶Ħafna jfittxu jinħabbu ma’ min hu jdejh miftuħa, kulħadd ħabib ta’ min iħobb jagħti.

⁷Lill-fqir sa ħutu jaħarbuh; kemm aktar ħbiebu jitbiegħdu minnu! Ifittixhom bi kliemu, imma kollu għalxejn.

⁸Min jikseb id-dehen iħobb lilu nnifsu, min jgħożż l-għaqal ikollu r-riżq.

⁹Min jixhed il-falz ma jibqax bla kastig, u min ilissen il-gideb jintilef.

¹⁰Ma jixraqlux lill-iblah il-lussu; kemm anqas lill-ilsir li jaħkem fuq il-kbarat!

¹¹Bniedem bil-għaqal idum ma jagħdab, hu ġieħ għalih jagħlaq għajnejh għall-offiża.

¹²L-għadab ta’ sultan bħal għajta ta’ ljun, imma ħnientu bħal nida fuq il-ħaxix.

¹³Iben iblah hu l-għali ta’ missieru, u mara ġellieda bħall-ilma jqattar dejjem.

¹⁴Id-dar u l-għana wirt il-missirijiet, imma mara bil-għaqal hi don tal-Mulej.

¹⁵L-għażż iġib in-ngħas, u l-għażżien ibati l-ġuħ.

¹⁶Min iħares il-liġi jħares lilu nnifsu; min imaqdar il-kelma ta’ Alla jmut.

¹⁷Min iħenn għall-fqir ikun qed jislef lill-Mulej, u hu jroddhulu bi ħlas tajjeb.

¹⁸Widdeb ’l ibnek dment li hemm tama għalih; imma tkunx daqshekk aħrax li twasslu għall-mewt.

¹⁹Min jagħdab iżżejjed ibati hu; u jekk teħilsu mill-kastig, jagħmel agħar.

²⁰Isma’ l-parir u ilqa’ t-tagħlim, biex ikollok l-għerf sal-aħħar ta’ ħajtek.

²¹Wieħed jista’ jfassal ħafna ħsibijiet, imma dak li jseħħ hu l-ħsieb tal-Mulej.

²²Il-bniedem jiġbdek bi tjubitu; aħjar tkun fqir milli giddieb.

²³Il-biża’ tal-Mulej iwassal għall-ħajja; min jimtela bih ma jilħqux id-deni.

²⁴L-għażżien idaħħal idu fil-platt, u mank ireġġagħha lura lejn ħalqu.

²⁵Jekk issawwat il-vjolenti, jitgħallem iċ-ċkejken, widdeb l-għaqli, u hu jifhmek u jitgħallem.

²⁶Min jgħakkes lil missieru u jkeċċi ’l barra ’l ommu, hu iben bla ġieħ u kollu għajb.

²⁷Tisma’ xejn it-tagħlim, ibni, la trid titwarrab minn kliem l-għerf.

²⁸Xhud ħażin jidħak bil-ġustizzja, u fomm il-ħżiena jibla’ l-qerq.

²⁹Għall-vjolenti hemm il-kundanna, u s-swat għal dahar il-boloh.