Read Maltese Bible with DC – IL-BIBBJA IL-KOTBA MQADDSA PROVERBJI 2 Bible Online

PROVERBJI 2 - Maltese Bible with DC – IL-BIBBJA IL-KOTBA MQADDSA bible

PROVERBJI 2

¹Ibni, jekk int tilqa’ kliemi, u taħżen ġo fik il-kmandamenti tiegħi

²billi tagħti widen għall-għerf, u tħalli lil moħħok jifhem sewwa;

³jekk issejjaħ l-għerf, u tgħolli leħnek għall-fehma t-tajba;

⁴jekk tfittex l-għerf bħall-fidda, u tħaffer għalih bħal teżor moħbi;

⁵imbagħad tifhem il-biża’ tal-Mulej, u ssib it-tagħrif ta’ Alla.

⁶Għax il-Mulej jagħti l-għerf, minn fommu ġej it-tagħrif u d-dehen.

⁷Hu jaħżen l-għajnuna għal min hu sewwa, hu tarka għal min jimxi bla ħtija;

⁸hu jħares it-triqat tal-ġusti, u jgħasses it-triq tat-twajbin tiegħu.

⁹Imbagħad int tifhem il-ħaqq u s-sewwa, u timxi f’kull triq li hi tajba.

¹⁰Għax l-għerf jidħollok f’moħħok, u t-tagħrif ikun l-għaxqa ta’ qalbek.

¹¹L-għaqal jgħasses fuqek, il-fehma tajba tħarsek,

¹²teħilsek minn triq il-ħażen, minn nies ta’ kliem il-għawġ;

¹³li tilfu t-triq it-tajba, biex jimxu f’toroq mudlama;

¹⁴li l-hena tagħhom jagħmlu l-ħażen, l-għaxqa tagħhom il-ħażen mill-agħar;

¹⁵nies li triqathom mgħawġa, u l-mixi tagħhom barra mit-triq.

¹⁶Jeħilsek l-għerf minn mart ħaddieħor, mill-mara barranija li tmelles bi kliemha,

¹⁷li twarrab sieħeb żgħożitha, u tinsa l-patt li għamlet ma’ Alla tagħha;

¹⁸darha lejn il-mewt nieżla, u l-mixi tagħha lejn Art l-Imwiet;

¹⁹ħadd ma jmur għandha u jerġa’ lura, jew jerġa’ jaqbad triq il-ħajja.

²⁰Int, mela, imxi fi triq it-tajbin, u żomm ma’ mogħdijiet il-ġusti;

²¹għax it-tajbin jgħammru fl-art, u n-nies sewwa joqogħdu fiha;

²²imma l-ħżiena mill-art jitqaċċtu, u l-qarrieqa jinqalgħu minnha.