Read Maltese Bible with DC – IL-BIBBJA IL-KOTBA MQADDSA PROVERBJI 20 Bible Online

PROVERBJI 20 - Maltese Bible with DC – IL-BIBBJA IL-KOTBA MQADDSA bible

PROVERBJI 20

¹L-inbid jagħmlek vjolenti, u x-xorb qawwi storbjuż; mhuwiex għaqli min jingħata għalihom.

²Għadab is-sultan bħal għajta ta’ ljun; min jiksirha miegħu, hemm ħajtu fin-nofs.

³Hu ġieħ għal bniedem li jitbiegħed mill-ġlied; kull min hu iblah jistieden it-tilwim.

⁴L-għażżien ma jaħdimx ir-raba’ fil-ħarifa; imbagħad għal xejn ifittex fi żmien il-ħsad.

⁵Il-ħsieb f’moħħ il-bniedem bħall-ilma f’bir fond; min moħħu jilħaqlu jaf joħroġhulu.

⁶Ħafna jiftaħru bi tjubithom; imma min jista’ jsib wieħed sinċier?

⁷Hu l-ġust li jimxi bir-reqqa; henjin uliedu li jiġu warajh!

⁸Sultan li joqgħod fuq it-tron tal-ħaqq, ixejjen il-ħażen bil-ħarsa t’għajnejh.

⁹Min jista’ jgħid: ‘Jien qalbi safja; jien nadif minn ħtijieti?’

¹⁰Użin doppju u kejl doppju, it-tnejn jobgħodhom il-Mulej.

¹¹Imqar tifel jingħaraf minn għemilu, jekk hux safi u tajjeb f’imġibtu.

¹²Il-widna li tisma’ u l-għajn li tara, it-tnejn il-Mulej għamilhom.

¹³Tħobbx l-irqad, għax tiftaqar; iftaħ għajnejk, u jkollok ħobż bix-xaba’.

¹⁴Imaqdar biss jaf ix-xerrej, u jmur jiftaħar b’dak li jkun xtara.

¹⁵Hemm id-deheb u ħaġar prezzjuż bil-kotra, imma kliem l-għerf hu egħżeż minnhom.

¹⁶Żommlu lbiesu ’l min jagħmel tajjeb għal ħaddieħor, żommhomlu b’rahan għal min hu barrani.

¹⁷Ħelu l-ħobż maqlugħ bis-serq, iżda mbagħad jimlielek ħalqek biż-żrar.

¹⁸Il-ħsibijiet jirnexxu bil-parir tajjeb, u agħmel il-gwerra wara ħafna ħsieb.

¹⁹Min ipaċpaċ ħafna ma jżommx sigriet; tagħmilhiex ma’ min ilablab wisq.

²⁰Min jisħet ’il missieru u ’l ommu, jintfielu d-dawl[21] fl-aqwa tad-dlam.

²¹Il-ġid miksub bl-għaġla mill-ewwel, ma jkollux barka fi tmiemu.

²²Tgħidx: ‘Ħa rrodd id-deni b’deni’ imma stenna li l-Mulej jeħilsek hu.

²³Użin doppju jobogħdu l-Mulej, miżien falz mhux sewwa quddiemu.

²⁴Il-ħajja tal-bniedem imexxiha l-Mulej; u kif jista’ l-bniedem jifhem triqtu?

²⁵Jidħol f’xibka min jagħmel wegħda bl-għaġla, għax imbagħad jerġa’ jibdielu.

²⁶Sultan għaref itajjar il-ħżiena, u minn fuqhom jgħaddi r-romblu.

²⁷Ir-ruħ fil-bniedem hi dawl il-Mulej, li jgħarrex il-moħbiet kollha tal-qalb.

²⁸It-tjieba u l-fedeltà jħarsuh lis-sultan, u bil-ħniena jissaħħaħ it-tron tiegħu.

²⁹Il-foħrija taż-żgħażagħ hi saħħithom, u l-bjuda ta’ xagħarhom il-ġieħ tax-xjuħ.

³⁰Is-swat li jfieri sewwa jfejjaq il-ħsara, u d-daqqiet inaddfu sa qiegħ il-qalb.