Read Maltese Bible with DC – IL-BIBBJA IL-KOTBA MQADDSA PROVERBJI 22 Bible Online

PROVERBJI 22 - Maltese Bible with DC – IL-BIBBJA IL-KOTBA MQADDSA bible

PROVERBJI 22

¹Aħjar isem tajjeb minn ħafna ġid, aħjar fama tajba mill-fidda u d-deheb.

²L-għani u l-fqir f’dan huma xorta waħda; li t-tnejn il-Mulej għamilhom.

³Min hu bil-għaqal jara l-għawġ u jwarrab; min hu moħħu ħafif jidħol fih u jħallas għalih.

⁴Min jiċċekken u jibża’ mill-Mulej, jieħu bi ħlasu għana, ġieħ u ħajja.

⁵Triq il-ħażin hi kollha xewk u għawġ; min jgħasses fuqu nnifsu jitbiegħed minnhom.

⁶Ħarreġ tifel jimxi fit-triq it-tajba; ma joħroġx minnha lanqas meta jixjieħ.

⁷L-għani jaħkem fuq il-fqir, u min jissellef jaqa’ f’idejn min silfu.

⁸Min jiżra’ d-dnewwa jaħsad l-għawġ, u ħatar għadbu jiġi fix-xejn.

⁹Min hu qalbu tajba jkun imbierek, għax hu jaqsam ħobżu ma’ min hu fqir.

¹⁰Warrab l-arroganti u jieqaf it-tilwim, u jintemm il-ġlied u t-tagħjir.

¹¹Il-Mulej iħobb lil min hu qalbu safja; min jitkellem bil-ħlewwa jogħġob lis-sultan.

¹²Il-Mulej iħares it-tagħlim, u jxejjen kliem il-qarrieq.

¹³L-għażżien jgħid: “Hemm iljun hemm barra; jekk noħroġ joqtolni f’nofs it-triq.”

¹⁴Kliem il-mara żienja bħal bir bla qiegħ; fih jaqa’ min għandu l-Mulej kontrih.

¹⁵Il-bluha b’għeruqha fil-qalb ta’ kull tifel; bis-saħħa tat-twiddib taqlagħhielu ’l barra.

¹⁶It-tagħkis tal-fqir[23] jista’ jiswielu ta’ ġid; min jagħti lill-għonja jiġi fil-bżonn.

¹⁷Agħti widen u isma’ kliem l-għorrief[24], u iftaħ moħħok għal tagħlimi.

¹⁸Ikun jaqbillek iżżommhom ġo fik, biex issibhom dejjem lesti f’fommok.

¹⁹Ħa ngħallmek illum triqat il-Mulej, biex fih tkun it-tama tiegħek.

²⁰Ktibtlek jien tletin proverbju, kollhom pariri u tagħlim,

²¹biex nurik it-tajjeb u s-sewwa, ħa tkun taf twieġeb tajjeb lil min bagħtek.

²²Tisraqx il-fqir għax hu fqir, u taħqarx l-imsejken fil-qorti;

²³għax il-Mulej jiddefendi l-kawża tagħhom, u jeqred lil dawk li jridu jeqirduhom.

²⁴Tkunx ħabib ta’ min jinkorla, tagħmilhiex ma’ min jisħon malajr,

²⁵biex ma tidrax tagħmel bħalu, u ssib ruħek fil-għawġ.

²⁶Tkunx minn dawk li jagħmlu tajjeb għal ħaddieħor, tidħolx garanti għad-djun tiegħu;

²⁷għax jekk ma jkollokx biex tħallas, sa friexek jeħdulek minn taħtek.

²⁸Tneħħix il-ġebel qadim ta’ bejn għalqa u oħra, li missirijietek qegħduhom b’sinjali.

²⁹Qatt rajt wieħed imħarreġ fis-sengħa tiegħu? Dan mas-slaten issibu, u mhux ma’ nies bla isem ta’ xejn.