Read Maltese Bible with DC – IL-BIBBJA IL-KOTBA MQADDSA PROVERBJI 23 Bible Online

PROVERBJI 23 - Maltese Bible with DC – IL-BIBBJA IL-KOTBA MQADDSA bible

PROVERBJI 23

¹Meta tkun qed tiekol ma’ xi ħadd kbir, aħseb sewwa min għandek quddiemek;

²u jekk int wikkiel ħafna, agħmel sikkina ma’ gerżumtek[25].

³Tixxennaqx għall-ikel bnin tiegħu, għax hu ikel li jqarraq bik.

⁴Titħabatx biex tikseb il-ġid, dan il-ħsieb neħħih minn moħħok;

⁵kif titfa’ għajnejk fuqu, ikun ġa għadda; għax żgur irabbi l-ġwienaħ, u jtir bħal ajkla fl-ajru.

⁶Tikolx il-ħobż ma’ min hu xħiħ, tixxennaqx għall-ikel bnin tiegħu;

⁷għax hu bħal wieħed jgħodd bil-qjies f’qalbu. Jgħidlek: “Kul u ixrob”, iżda mhux minn qalbu.

⁸Il-bukkun li tiekol taqilgħu, u tkun ħlejt il-kliem sabiħ tiegħek.

⁹Toqgħodx titkellem ma’ min hu iblah, għax hu jmaqdar il-kliem għaqli tiegħek.

¹⁰Tneħħix il-ġebel qadim ta’ bejn għalqa u oħra, u tidħolx fir-raba’ tal-iltiema;

¹¹għax min iħarishom qawwi ħafna, hu jiddefendi kontrik il-kawża tagħhom.

¹²Żomm moħħok fit-tagħlim, agħti widen għal kliem id-dehen.

¹³Tħallix lit-tifel bla twiddib; mhux se jmut għax issawtu bil-bastun.

¹⁴Jekk issawtu bil-bastun, tkun qed teħilsu mill-mewt.

¹⁵Ibni, jekk qalbek tħobb l-għerf, lili wkoll tferraħli qalbi;

¹⁶nifraħ b’qalbi kollha, meta minn fommok joħroġ is-sewwa.

¹⁷Tħallix lil qalbek tgħir għall-midinbin, iżda ibqa’ kuljum fil-biża’ tal-Mulej.

¹⁸Għax hemm ħajja għalik għaż-żmien li ġej, u t-tama tiegħek ma tkunx fiergħa.

¹⁹Isma’, ibni, u kun bil-għaqal, u agħraf imxi fit-triq it-tajba.

²⁰Tagħmilhiex ma’ dawk li jlegilgu l-inbid, u ma’ dawk li għandhom kilba għal-laħam;

²¹għax l-ikel u x-xorb żejjed iwasslu għall-faqar, u min iħobb l-irqad iċ-ċraret jilbes.

²²Isma’ minn missierek li tak il-ħajja, u tmaqdarx ’l ommok meta tixjieħ.

²³Ixtri s-sewwa u terġax tbigħu; ikseb l-għerf, it-tagħlim u d-dehen.

²⁴Missier il-ġust għandu ħafna għax jifraħ, min għandu ibnu għaref jithenna bih.

²⁵Jithennew bik missierek u ommok, u tifraħ bik dik li wilditek!

²⁶Ibni, agħtini qalbek, u għajnejk jitgħaxxqu bi triqati.

²⁷Mara żienja hi bir bla qiegħ, mara ġerrejja bħal bir dejjaq.

²⁸Bħal ħalliel toqgħod tissajja, u tkattar l-irġiel li jibdlu ’l marthom.

²⁹Min hu fl-għali jew fin-niket? Min hu fil-ġlied u fl-inkwiet? Min hu msawwat bla ma jaf għaliex? Min għandu għajnejh ħomor nar?

³⁰Dawk li jdumu jixorbu l-inbid, dawk li jfittxu jduqu x-xorb imħawwar.

³¹Tħarisx lejn l-inbid meta jkun iħammar, meta jkun itextex fit-tazza.

³²Jinżillek ħelu, u mbagħad bħal serp jigdmek, u bħal lifgħa jniggżek.

³³Għajnejk jaraw kollox bil-maqlub, u minn moħħok joħroġ kliem imħawwad.

³⁴Tkun qisek mimdud fuq wiċċ il-baħar, bħal wieħed mitluq mal-art fuq ġifen.

³⁵U thewden: ‘Laqtuni, imma ma ħassejtx; sawtuni, imma ma weġġajtx. Xħin niġi f’tiegħi, nerġa’ mmur infittex l-inbid.’