Read Maltese Bible with DC – IL-BIBBJA IL-KOTBA MQADDSA PROVERBJI 24 Bible Online

PROVERBJI 24 - Maltese Bible with DC – IL-BIBBJA IL-KOTBA MQADDSA bible

PROVERBJI 24

¹M’għandekx għalfejn tgħir għall-ħżiena jew tixtieq tagħmilha magħhom;

²għax fuq id-dnewwa jaħseb moħħhom, u kliem l-għawġ joħroġ minn fommhom.

³Id-dar bl-għerf tinbena u bid-dehen tissaħħaħ;

⁴bl-għaqal jimtlew il-kmamar, b’kull ġid għażiż u jogħġob.

⁵L-għaref aqwa minn wieħed b’saħħtu, min għandu t-tagħlim aqwa minn dak li jiflaħ;

⁶għax bit-tmexxija għaqlija tintrebaħ il-gwerra, b’ħafna pariri tinkiseb ir-rebħa.

⁷L-għerf għoli wisq għall-iblah; f’bieb il-belt[26] l-iblah ma jiftaħx fommu.

⁸Min jaħseb biex jagħmel id-deni, jissejjaħ bniedem tal-għawġ.

⁹Dnubiet huma ħsibijiet l-iblah, u l-arroganti jistmelluh in-nies.

¹⁰Jekk int tintreħa fir-riżq it-tajjeb, x’saħħa għandek fir-riżq il-ħażin?

¹¹Lil min hu meħud għall-mewt eħilsu, lil min hu mkaxkar għall-qatla salvah.

¹²Jekk int tgħid: “Ma kontx naf b’dan”; taħseb li Dak, li jiżen il-qlub, ma jindunax? Dak li jgħasses fuqek, kollox jaf; Hu jrodd lil kulħadd skont għemilu.

¹³Ibni, kul l-għasel, għax hu tajjeb, u l-qtar tax-xehda, għax togħmtu ħelwa.

¹⁴Kun af li hekk hu l-għerf għalik; jekk issibu, jiswielek għal li ġej, u t-tama tiegħek ma tkunx fiergħa.

¹⁵Toqgħodx tissajja għal fejn joqgħod il-ġust, tagħmilx ħsara lil daru.

¹⁶Imqar jekk il-ġust jaqa’ seba’ darbiet[27], dejjem jerġa’ jqum, imma l-ħżiena mill-ħsara jibqgħu mifxula.

¹⁷Tifraħx meta jaqa’ l-għadu tiegħek, tithenniex f’qalbek meta jogħtor;

¹⁸jekk jara dan il-Mulej ma jifraħx bik, u lilu jneħħilu l-korla tiegħu minn fuqu.

¹⁹Tinkeddx minħabba l-ħżiena, u tgħirx għal min jagħmel il-ħażen;

²⁰għax il-ħżiena m’għandhomx tama għal li ġej, u d-dawl tal-ħżiena għad jintefa.

²¹Ibni, ibża’ mill-Mulej u mis-sultan, u teħodha qatt kontra tagħhom it-tnejn;

²²għax għal għarrieda minnhom tiġi l-ħsara, u l-qerda li minnhom tiġi min jagħrafha?

²³Dawn ukoll kliem l-għorrief: mhux sewwa żżomm ma’ dak u mal-ieħor fil-ħaqq.

²⁴Min lil ħati jgħidlu: “Int bla ħtija,” jisħtuh il-popli, jistkerrhuh il-ġnus;

²⁵imma dawk li jikkundannaw il-ħati riżqhom tajjeb, ikollhom fuqhom barka bil-kotra.

²⁶Min jagħti tweġiba onesta, daqs kemm kieku jagħti bewsa fuq ix-xufftejn.

²⁷Qis li xogħlok ikun f’postu, u li jkollok kollox lest għal xogħol ir-raba’; u mbagħad ibni darek.

²⁸Tixhidx bla raġuni kontra għajrek, u tqarraqx bih b’xufftejk.

²⁹Tgħidx: “Kif għamilli hu, nagħmillu jien[28]; rroddlu skont għemilu.”

³⁰Għaddejt ħdejn l-għalqa ta’ wieħed għażżien, ħdejn l-għalqa tad-dwieli ta’ wieħed bla moħħ;

³¹u rajtha kollha ħaxix ħażin, miksija kollha bil-ħurrieq, u l-ħitan tagħha mġarrfa.

³²Ħarist lejha u qgħadt naħseb; rajtha u ħadt tagħlima:

³³daqqa tongħos, daqqa torqod, daqqa torbot idejk biex tistrieħ;

³⁴u jiġi fuqek bħal ħalliel il-faqar, u bħal wieħed armat l-għaks.