Read Maltese Bible with DC – IL-BIBBJA IL-KOTBA MQADDSA PROVERBJI 25 Bible Online

PROVERBJI 25 - Maltese Bible with DC – IL-BIBBJA IL-KOTBA MQADDSA bible

PROVERBJI 25

¹Dawn ukoll proverbji ta’ Salamun, miġbura min-nies ta’ Ħeżekija[29], sultan ta’ Ġuda.

²Hu ġieħ għal Alla li ħaġa jaħbiha; imma ġieħ għas-slaten li jikxfuha.

³Għolja s-smewwiet u fond qiegħ l-art, u qalb is-slaten ma titkejjilx.

⁴Saffi mill-ħmieġ il-fidda, u tkun tajba għal min jaħdimha;

⁵neħħi l-ħżiena minn quddiem is-sultan, u jitwettaq bil-ġustizzja t-tron tiegħu.

⁶Tersaqx ’il quddiem lejn is-sultan, toqgħodx fejn joqogħdu l-kbarat[30];

⁷għax aħjar jgħidulek: “Itla’ ’l fuq”, milli jniżżluk ’l isfel quddiem il-kbarat. Dak li tkun rajt

⁸ixxandrux malajr quddiem kulħadd, għax x’tagħmel imbagħad, meta fl-aħħar għajrek iħammarlek wiċċek?

⁹Il-kawża tiegħek aqtagħha ma’ għajrek, imma tikxifx dak li taf fuq ħaddieħor,

¹⁰li ma jmurx jgħajrek min jisimgħek, u t-tebgħa kerha ma tmurx minn fuqek.

¹¹Bħal tuffieħ tad-deheb fuq platt tal-fidda, hi l-kelma li tingħad f’waqtha.

¹²Bħal misluta tad-deheb u bħal kullana tad-deheb, hi t-twissija tal-għaref għal min jismagħha.

¹³Bħall-frisk tas-silġ fi żmien il-ħsad, hu l-qaddej fidil għal min jibagħtu; u hu qalb sidu jserraħ.

¹⁴Bħas-sħab u r-riħ bla xita, hu min jiftaħar li jagħti u ma jagħti qatt.

¹⁵Lil min hu kbir bis-sabar tfiehmu, bil-kelma t-tajba tkisser l-għadam.

¹⁶Jekk issib l-għasel, kul kemm teħtieġ; tikolx iż-żejjed għax ikollok taqilgħu.

¹⁷Toqgħodx ġej u sejjer f’dar ġarek, għax iddejqu u jixba’ minnek.

¹⁸Bħal mazza jew sejf jew vleġġa misnuna, min jixhed ħażin kontra sieħbu.

¹⁹Bħal sinna mħassra u sieq imfekka, min jitma fi bniedem ħajjen fi żmien l-inkwiet.

²⁰Bħal ħall fuq ġerħa min joqgħod jgħanni lill-qalb muġugħa.

²¹Jekk l-għadu tiegħek bil-ġuħ, itimgħu[31]; jekk inhu bil-għatx, isqih;

²²hekk tiġmagħlu l-ġamar fuq rasu[32], u jkun il-Mulej li jroddlok.

²³Kif ir-riħ fuq iġib ix-xita, hekk l-ilsien li jqassas iġib il-ħars bl-ikrah.

²⁴Aħjar tgħix f’rokna fuq bejt, milli f’dar kbira ma’ mara ġellieda.

²⁵Bħall-ilma frisk għal min hu bil-għatx, hekk hi aħbar tajba minn art imbiegħda.

²⁶Bħal nixxiegħa mdardra u għajn imniġġsa, hu l-ġust li jaqa’ quddiem min hu ħażin.

²⁷Mhux tajjeb tiekol ħafna għasel; hekk ukoll min ifittex ġieħ fuq ieħor[33].

²⁸Bħal belt miftuħa u bla ħitan, hekk hu l-bniedem li ma jitrażżanx.