Read Maltese Bible with DC – IL-BIBBJA IL-KOTBA MQADDSA PROVERBJI 26 Bible Online

PROVERBJI 26 - Maltese Bible with DC – IL-BIBBJA IL-KOTBA MQADDSA bible

PROVERBJI 26

¹Bħas-silġ fis-sajf u x-xita waqt il-ħsad, hekk il-ġieħ lill-iblah ma jixraqlu xejn.

²Bħal għasfur maħrub, bħal ħuttafa tittajjar, saħta għal xejn b’xejn ma sseħħx fis-sema.

³Il-frosta għaż-żiemel, ir-riedni għall-ħmar, u l-ħatar għal dahar il-boloh.

⁴Tweġibx lill-iblah skont bluhatu[34], biex ma tkunx bħalu int ukoll.

⁵Wieġeb lill-iblah skont bluhatu, biex ma jaħsibx li hu xi għaref.

⁶Min jibgħat lill-iblah jagħmillu xi qadja, ikun qed jaqta’ riġlejh u jixrob l-inkwiet.

⁷Bħar-riġlejn imdendla ta’ wieħed zopp, hekk proverbju fuq fomm l-iblah.

⁸Bħal min jorbot iż-żrar mal-iżbandola, hekk hu min jagħti ġieħ lill-iblah.

⁹Bħal xewka f’id wieħed fis-sakra, hu proverbju fuq fomm l-iblah.

¹⁰Bħal min itajjar il-vleġeġ fuq kull min jgħaddi, min jinqeda bl-iblah u s-sakranazz.

¹¹Bħal kelb li jerġa’ jiekol dak li jaqla’, hekk l-iblah li jtenni bluhatu.

¹²Qatt rajt wieħed jidhirlu li hu għaref? Hemm aktar tama għall-iblah milli għalih.

¹³L-għażżien jgħid: “Hemm iljun fit-triq! Hemm iljun f’salib it-toroq!”

¹⁴Il-bieb idur fuq iċ-ċappetti, u l-għażżien jitqalleb fuq friexu.

¹⁵L-għażżien idaħħal idu fil-platt, u qajla jreġġagħha lura lejn ħalqu.

¹⁶L-għażżien jidhirlu li hu aktar għaref, minn sebgħa li jafu jwieġbu sewwa.

¹⁷Min jindaħal fi ġlied ħaddieħor, ikun qed jaqbad kelb minn widnejh.

¹⁸Bħal wieħed miġnun li jwaddab xrar tan-nar u vleġeġ tal-mewt,

¹⁹hekk min iqarraq b’ħaddieħor, imbagħad jgħid: “Dan biex niċċajta.”

²⁰Jekk ma jkunx hemm ħatab, jintefa n-nar, u jekk ma jkunx hemm min isefsef, jieqaf il-ġlied.

²¹Bħall-faħam għall-ġamar u l-ħatab għan-nar, hekk il-ġellied biex ikebbes it-tilwim.

²²Kliem is-sefsief bħal ikel bnin, li jinżel sa qiegħ l-istonku.

²³Kisja tal-fidda fuq biċċa tal-fuħħar, huma x-xufftejn ħelwin ma’ qalb qarrieqa.

²⁴Min jobogħdok jinħeba fi kliemu; f’qalbu jbejjet il-qerq;

²⁵jekk ikellmek bil-ħlewwa, temmnux; f’qalbu għandu seba’ saħtiet[35].

²⁶Bil-qerq jaħbi l-mibegħda tiegħu, imma ħżunitu tinkixef quddiem il-ġemgħa.

²⁷Min iħaffer ħofra jaqa’ ġo fiha, min igerbeb blata, tinqaleb fuqu.

²⁸Ilsien giddieb jobgħod is-sewwa, u fomm imelles iwassal għat-tiġrif.