Read Maltese Bible with DC – IL-BIBBJA IL-KOTBA MQADDSA PROVERBJI 27 Bible Online

PROVERBJI 27 - Maltese Bible with DC – IL-BIBBJA IL-KOTBA MQADDSA bible

PROVERBJI 27

¹Tiftaħarx bil-jum ta’ għada, għax ma tafx x’se jġib miegħu l-jum.

²Ħa jfaħħrek ħaddieħor, iżda mhux fommok; min hu barrani, iżda mhux xufftejk.

³Il-ġebel qawwi u r-ramel tqil, imma qillet l-iblah itqal minnhom it-tnejn.

⁴Il-qilla kiefra u l-għadab ikaxkar; imma l-għira min jista’ għaliha?

⁵Aħjar ċanfira f’wiċċek, minn imħabba moħbija.

⁶Is-swat ta’ min iħobb, sinċier, il-bews ta’ min jobgħod, qarrieq.

⁷Min hu xebgħan sal-għasel idejqu, min hu bil-ġuħ kull morr jiġih ħelu.

⁸Bħal għasfur li jitbiegħed mill-bejta, hekk hu dak li jitbiegħed minn daru.

⁹Il-fwieħa u l-inċens iferrħu l-qalb, u l-ħlewwa ta’ ħabib hena tar-ruħ.

¹⁰Tinsiex lil ħabibek u ’l ħabib missierek, tmurx f’dar ħuk meta tkun fl-inkwiet. Aħjar ġar fil-qrib minn ħuk fil-bogħod.

¹¹Kun għaref, ibni, u ferraħli qalbi, biex inkun nista’ nwieġeb lil min jgħajjarni.

¹²Min hu bil-għaqal jara l-għawġ u jwarrab; min moħħu ħafif jidħol fih u jħallas għalih.

¹³Żommlu lbiesu ’l min jagħmel tajjeb għal ħaddieħor; żommhomlu b’rahan għal min hu barrani.

¹⁴Min ibierek lil ġaru b’leħen għoli[36], sa minn sbieħ il-jum, tistħajlu aktar qiegħed jisħtu.

¹⁵L-ilma jqattar dejjem f’jum ix-xita, u mara ġellieda, it-tnejn xorta;

¹⁶tipprova żżommilha, qisek qed iżżomm ir-riħ, jew taqbad b’idek iż-żejt.

¹⁷Kif il-ħadid isinn il-ħadid, hekk bniedem jirfina lil sieħbu.

¹⁸Min jieħu ħsieb is-siġra tat-tin jiekol minn frottha, u min iħares lil sidu jkollu l-ġieħ.

¹⁹Kif fl-ilma tara wiċċek, hekk f’qalb ħaddieħor tara qalbek.

²⁰Qiegħ l-Art u l-Imwiet qatt ma jimtlew; hekk qatt ma jixbgħu għajnejn il-bniedem.

²¹Il-fidda tidher bin-nar u d-deheb fil-forn; u l-bniedem jintwera bil-fomm ta’ min ifaħħru.

²²Lanqas jekk tisħqu f’mehrież lill-iblah, ma tneħħilu minn fuqu bluhatu.

²³Agħraf sewwa n-nagħaġ tiegħek[37], ħu ħsieb l-imrieħel tiegħek;

²⁴għax l-għana ma jibqax għal dejjem, u lanqas il-ġieħ minn nisel għal ieħor.

²⁵Jintemm il-ħaxix u jidher inbiet ieħor, u jinġabar il-ħaxix tal-għoljiet;

²⁶il-ħrief jagħtuk x’tilbes, il-gidjien jiswewlek daqs għalqa;

²⁷il-mogħoż jagħtuk ħalib biżżejjed għall-ikel tiegħek u tan-nies ta’ darek, u għall-għajxien tax-xbejbiet tiegħek.