Read Maltese Bible with DC – IL-BIBBJA IL-KOTBA MQADDSA PROVERBJI 28 Bible Online

PROVERBJI 28 - Maltese Bible with DC – IL-BIBBJA IL-KOTBA MQADDSA bible

PROVERBJI 28

¹Il-ħażin jaħrab għalkemm ħadd ma jiġri warajh; imma l-ġust qalbieni bħal iljun.

²Minħabba l-ħtija ta’ pajjiż ħafna huma l-ħakkiema[38]; imma b’raġel dehni u għaref, il-pajjiż iżomm sħiħ fit-tul.

³Bniedem setgħan li jgħakkes il-fqar, bħax-xita bil-qliel li ma tagħtix ħobż.

⁴Dawk li jwarrbu l-Liġi jfaħħru l-ħażin, imma dawk li jħarsuha jeħduha kontrih.

⁵In-nies ħżiena ma jifhmux fil-ħaqq, imma dawk li jfittxu l-Mulej kollox jifhmu.

⁶Aħjar il-fqir li jgħix bla ħtija, mill-għani li jimxi bit-tagħwiġ.

⁷Min iħares il-Liġi hu tifel bil-għaqal, iżda min jagħmilha mal-wikkiela hu l-għajb ta’ missieru.

⁸Min ikattar ġidu bl-imgħax u l-qligħ żejjed[39], ikun ifaddal għal dak li jħenn għall-foqra.

⁹Min isodd widnejh biex ma jismax il-Liġi, Alla wkoll jistmell it-talb tiegħu.

¹⁰Min idaħħal it-tajbin fi triq ħażina, jaqa’ fil-ħofra li jkun ħaffer. Imma min hu bla ħtija jkollu wirt tajjeb.

¹¹L-għani jaħseb li hu għaref, imma l-fqir bil-għaqal jagħrfu sewwa.

¹²Meta jirbħu l-ġusti, ikun hemm ferħ kbir; imma meta jitilgħu l-ħżiena, in-nies tinħeba.

¹³Min jaħbi ħtijietu ma jiksibx ġid, imma min jistqarrhom u jaqtagħhom jaqla’ l-ħniena.

¹⁴Hieni l-bniedem li dejjem jibża’ minn Alla! Imma min iwebbes qalbu jiġi fl-għali.

¹⁵Bħal iljun jgħajjat u ors bil-għatx, hu mexxej ħażin ta’ poplu msejken.

¹⁶Mexxej nieqes minn moħħu jgħakkes dejjem aktar; imma min jobgħod il-qligħ ħażin jgħix għomor twil.

¹⁷Min xerred demm ħaddieħor, jiġri lejn il-qabar u ħadd ma jeħilsu.

¹⁸Min jimxi bis-sewwa jsalva, imma min jimxi bl-imgħawweġ jaqa’ fil-ħofra.

¹⁹Min jaħdem ir-raba’ tiegħu jiekol bix-xaba’, imma min jingħata għall-frugħat jirkbu l-għaks.

²⁰Bniedem onest ikollu barka bil-kotra, imma kastig ikollu min irid jistagħna malajr.

²¹Mhux sewwa tħares lejn l-uċuħ; għal loqma ħobż tagħmel il-ħażin.

²²Min hu rgħib irid jistagħna f’qasir żmien, bla ma jaħseb li għad jilħqu l-għaks.

²³Jekk twissi lil xi ħadd, fl-aħħar tirbaħ imħabbtu, aktar minn dak li jżiegħel bih bi kliemu.

²⁴Min lil missieru u ’l ommu jisraq u jgħid mhux dnub, ikun qed jissieħeb mal-ħalliel.

²⁵Min hu rgħib iġib il-ġlied, imma min jittama fil-Mulej jistagħna.

²⁶Min jafda fih innifsu hu iblah, imma min jimxi fit-triq tal-għerf jimxi fis-sod.

²⁷Min jagħti lill-fqir ma jkun jonqsu xejn, imma min jagħlaq għajnejh saħtiet ikollu.

²⁸Meta jitilgħu l-ħżiena, in-nies tinħeba, imma meta jaqgħu, joktru t-tajbin.