Read Maltese Bible with DC – IL-BIBBJA IL-KOTBA MQADDSA PROVERBJI 3 Bible Online

PROVERBJI 3 - Maltese Bible with DC – IL-BIBBJA IL-KOTBA MQADDSA bible

PROVERBJI 3

¹Ibni, tinsiex it-tagħlim tiegħi, iżda żomm f’qalbek il-kmandamenti tiegħi;

²għax għomor twil u ħafna snin, u riżq tajjeb iġibulek.

³It-tjieba u l-fedeltà tħallihomx iħalluk; ma’ għonqok orbothom; iktibhom f’qalbek.

⁴Hekk issib xorti u isem tajjeb quddiem Alla u l-bnedmin.

⁵Ittama fil-Mulej b’qalbek kollha, u tafdax fl-għaqal tiegħek.

⁶Fih aħseb f’kulma tagħmel, u hu jwittilek triqatek.

⁷Toqgħodx taħseb kemm inti għaref, imma ibża’ mill-Mulej u warrab mill-ħażen.

⁸Ħa jkun dan is-saħħa ta’ ġismek, u d-duwa għal għadmek.

⁹Weġġaħ lill-Mulej b’ġidek, u bl-ewwel dħul tal-qligħ tiegħek;

¹⁰u jimtlew bil-qamħ l-imħażen tiegħek, u l-imgħasar bl-inbid ifuru.

¹¹Ibni, tistmerrx it-tagħlim tal-Mulej, u tiddejjaqx bit-twiddib tiegħu,

¹²għax il-Mulej iwiddeb lil min iħobb, u jgħakkes ’l ibnu l-maħbub.

¹³Hieni min isib l-għerf, u l-bniedem li jikseb id-dehen,

¹⁴għax qligħ l-għerf jiswa aktar mill-fidda, u l-ġid li jġiblu hu aħjar mid-deheb.

¹⁵L-għerf hu egħżeż mill-ħaġar prezzjuż, kulma tixtieq qalbek ma jiswiex daqsu.

¹⁶Għomor twil f’idu l-leminija, għana u ġieħ fix-xellugija.

¹⁷Fihom għaxqa triqatu, kollha sliem mogħdijietu.

¹⁸Hu siġra tal-ħajja[6] għal min iħaddnu; hieni hu min iżomm sħiħ miegħu.

¹⁹Bl-għerf il-Mulej waqqaf l-art, bid-dehen saħħaħ is-smewwiet;

²⁰bl-għerf tiegħu nfetħu qigħan il-baħar, u s-sħab iraxxax il-qtar tan-nida.

²¹Ibni, żomm l-għaqal u l-qjies, twarrabhomx minn quddiem għajnejk;

²²huma jkunu l-ħajja ta’ ruħek, u t-tiżjin ta’ għonqok.

²³Imbagħad timxi bla biża’ fi triqtek, u ma jogħtrux riġlejk.

²⁴Jekk tmur torqod, ma jkollokx għax tibża’; xħin timtedd, jiġik ħelu l-irqad.

²⁵Tibżax meta tara l-boloh jitwerwru, jew tiġi fuqhom il-ħsara tal-ħżiena,

²⁶għax il-Mulej ikun maġenbek, u jħarislek riġlek biex ma tinqabadx.

²⁷Min ħaqqu l-ġid tiċħadhulux, meta dan tista’ tagħmlu.

²⁸Tgħidx lil għajrek: “Mur, u erġa’ ejja; nagħtik għada,” meta għandek mnejn tagħtih.

²⁹Tfassalx il-ħsara kontra għajrek, hu u jserraħ bit-tama fik.

³⁰Titlewwimx ma’ ħaddieħor għal xejn b’xejn, jekk ma għamillek l-ebda deni.

³¹Tgħirx għall-bniedem vjolenti, u titħajjarx timxi fuq xi mġiba tiegħu;

³²għax min jimxi bl-imgħawweġ jistkerrhu l-Mulej, imma f’idejh huma dawk li jimxu bis-sewwa.

³³Is-saħta tal-Mulej f’dar il-ħżiena, imma hu jbierek djar it-tajbin.

³⁴Min iżeblaħ lill-oħrajn jistmellu l-Mulej, imma lit-twajbin jagħtihom il-grazzja.

³⁵L-għorrief jirtu l-ġieħ, imma l-boloh jiksbu l-għajb.