Read Maltese Bible with DC – IL-BIBBJA IL-KOTBA MQADDSA PROVERBJI 31 Bible Online

PROVERBJI 31 - Maltese Bible with DC – IL-BIBBJA IL-KOTBA MQADDSA bible

PROVERBJI 31

¹Kliem Lemuwel[44], sultan ta’ Massa[45], li tgħallem mingħand ommu.

²X’se ngħidlek, ibni? X’se ngħidlek, bin ġufi? X’se ngħidlek, bin il-wegħdi tiegħi?

³Taħlix saħħtek man-nisa, tagħtix ħajtek lil dawk li jgħarrqu s-slaten.

⁴Ma jixraqx li s-slaten jixorbu l-inbid, u li l-mexxejja jieħdu xorb qawwi.

⁵Jekk ikunu xurbana, jinsew il-liġi, u jdawru l-ħaqq kontra kull imsejken.

⁶Ix-xorb qawwi hu għal min hu mdejjaq, u l-inbid għal min hu qalbu sewda.

⁷Jixrob u jinsa l-faqar tiegħu, u ma jiftakarx iżjed fl-hemm tiegħu.

⁸Iftaħ fommok għall-imbikkmin, biex taqbeż għal kull min hu msejken.

⁹Iftaħ fommok u agħmel ħaqq bis-sewwa, ħares id-drittijiet tal-fqir u l-imsejken.

¹⁰Mara ta’ ħila[46] min isibha? Tiswa ħafna aktar mill-ġawhar.

¹¹Fuqha tistrieħ qalb żewġha, u dan żgur ikunlu ta’ ġid.

¹²Riżq tajjeb iġġiblu, u mhux ħażin, il-jiem kollha ta’ ħajjitha.

¹³Tfittex suf u ħjut tal-qoton, u taħdmu bil-qalb b’idejha.

¹⁴Bħal ġifen tal-merkanti[47], hi ġġib mill-bogħod ikilha.

¹⁵Tqum ikun għadu billejl, tħejji l-ikel għan-nies ta’ darha, u x-xogħol lix-xebbiet tagħha.

¹⁶Titfa’ għajnejha fuq għalqa, u tixtriha; bil-qligħ ta’ idejha tħawwilha dwieli.

¹⁷Tħażżem ġenbejha bil-qawwa, u ssaħħaħ għax-xogħol dirgħajha.

¹⁸Tara r-riżq tax-xogħol tagħha; lanqas billejl ma titfi l-musbieħ tagħha[48].

¹⁹Tmidd idejha għall-magħżel, jaqbdu d-dussies idejha.

²⁰Tiftaħ mal-fqir idejha, tmidd idejha lejn l-imsejken.

²¹Ma tibżax mis-silġ għan-nies ta’ darha, għax kollha għandhom żewġt ilbiesi.

²²Ħwejjiġha hi tagħmilhom; għażel fin u porpra lbiesha.

²³Żewġha magħruf f’bieb il-belt, meta joqgħod mal-kbarat tal-pajjiż.

²⁴Tinseġ drapp tal-għażel u tbigħu; u tagħti trieħi lill-merkanti.

²⁵Tilbes bil-ġieħ u l-qawwa, tħares daħkana lejn il-ġejjieni[49].

²⁶Kliem l-għerf għandha fuq fommha, kliem it-tjieba fuq ilsienha.

²⁷Ħsiebha fit-tmexxija ta’ darha, minn ħobż l-għażż ma tiekol qatt.

²⁸Uliedha jqumu u hienja jsejħulha; u żewġha wkoll ifaħħarha u jgħidilha:

²⁹“Ħafna nisa wrew ħila kbira imma inti lkoll għaddejthom.”

³⁰Qarrieqa l-ħlewwa tal-mara, fiergħa sbuħitha; mara li tibża’ mill-Mulej ta’ min ifaħħarha[50].

³¹Agħtuha mill-frott ta’ xogħol idejha. Ħa jfaħħruha f’bibien il-belt l-għemejjel tagħha.