Read Maltese Bible with DC – IL-BIBBJA IL-KOTBA MQADDSA PROVERBJI 4 Bible Online

PROVERBJI 4 - Maltese Bible with DC – IL-BIBBJA IL-KOTBA MQADDSA bible

PROVERBJI 4

¹Isimgħu, uliedi, it-tagħlim ta’ missier, qisu li titgħallmu l-għaqal;

²għax jien tagħlim tajjeb nagħtikom; għalhekk tinsewx twissijieti.

³Kont għadni tifel ma’ missieri, żgħir u waħdieni taħt għajnejn ommi.

⁴Hu kien jgħallimni u jgħidli: “Żomm kliemi b’qalbek kollha; ħares il-kmandamenti tiegħi, u jkollok il-ħajja.

⁵Ikseb l-għerf, ikollok id-dehen, tinsihomx, u titwarrabx minn kliem fommi.

⁶Twarrbux minnek, u hu jżommok, ħobbu, u hu jieqaf miegħek.

⁷L-aqwa ħaġa, li tikseb l-għerf; ikseb id-dehen akkost ta’ kollox.

⁸Għożżu, u hu jżommok fl-għoli, tgħannaq miegħu, u jkunlek ta’ ġieħ.

⁹Iqegħedlek fuq rasek kuruna sabiħa, jitfa’ fuqek tiżjin kollu ġmiel.”

¹⁰Isma’ ibni, u ilqa’ kliemi, u joktru s-snin ta’ ħajtek.

¹¹Jien nurik it-triq tal-għerf, immexxik fil-mogħdija tas-sewwa.

¹²Fil-mixi tiegħek ma ssibx xi jfixklek, u jekk tiġri, ma taqax.

¹³Żomm mat-tagħlim, u tħallih qatt, ħarsu sewwa, għax hu ħajtek.

¹⁴Taqbadx il-mogħdija tal-ħżiena, timxix fit-triq ta’ min jagħmel id-deni.

¹⁵Aħrabha, tgħaddix minnha; mur fuq naħa oħra, u ibqa’ sejjer.

¹⁶Għax il-ħżiena ma jorqdux, jekk ma jagħmlux id-deni, itirilhom ngħashom, jekk ma jwaqqgħux lil xi ħadd.

¹⁷Huma jieklu ħobż il-ħażen, u jixorbu nbid il-vjolenza.

¹⁸Imma triq it-tajbin bħal dawl iż-żerniq, li jżid jitqawwa sal-milja tal-jum.

¹⁹Triq il-ħżiena bħal dalma kbira, lanqas biss jilmħu dak li jġegħelhom jaqgħu.

²⁰Ibni, agħti widen għal kliemi, iftaħ widnejk għal dak li ngħid jien.

²¹Tħallihomx iwarrbu minn quddiem għajnejk, żommhom fil-qiegħ ta’ qalbek.

²²Għax huma l-ħajja għal min isibhom, u s-saħħa għal ġismu kollu.

²³Ħares lil qalbek bir-reqqa kollha, għax minnha ġejja l-ħajja.

²⁴Warrab minnek ħażen il-fomm, biegħed minnek qerq ix-xufftejn.

²⁵Żomm għajnejk dritti quddiemek, u ħarstek ’il quddiem itfagħha.

²⁶Ara fejn titfa’ riġlek fi triqtek, u li triqatek kollha jkunu tajba.

²⁷Tgħawwiġx ’l hawn u ’l hemm, u warrab riġlejk mill-ħażen.