Read Maltese Bible with DC – IL-BIBBJA IL-KOTBA MQADDSA PROVERBJI 5 Bible Online

PROVERBJI 5 - Maltese Bible with DC – IL-BIBBJA IL-KOTBA MQADDSA bible

PROVERBJI 5

¹Ibni, agħti kas għerfi, agħti widen għal tagħlimi,

²biex tagħraf iżżomm il-qjies, u kliemek ikun mogħni bl-għerf.

³Xufftejn il-mara żienja għasel iqattru, u kliemha mieles aktar miż-żejt;

⁴imma fl-aħħar hi morra daqs l-assenzju, taqta’ daqs sejf b’żewġt ixfar.

⁵Lejn il-mewt jinżlu riġlejha, lejn qiegħ l-art jieħu l-mixi tagħha.

⁶Ma tagħtix kas triq il-ħajja, ’l hawn u l’hemm timxi, m’għandhiex kwiet.

⁷Imma, ibni, isma’ lili, titbigħedx minn kliem fommi.

⁸Żomm triqtek ’il bogħod minnha, u tersaqx qrib bieb darha,

⁹biex ma titlifx ġieħek quddiem ħaddieħor; u lanqas titlaq sninek lil xi ħadd bla ħniena[7],

¹⁰biex ma jitpaxxewx b’ġidek il-barranin, u frott xogħlok imur f’dar ħaddieħor.

¹¹U int toqgħod tokrob fl-aħħar ta’ ħajtek, huma u jintemmu laħmek u ġismek.

¹²Imbagħad tgħid: “Kemm kont nobogħdu t-tagħlim, u ma kontx naħmel it-twiddib!

¹³Ma smajtx kliem min ried jgħallimni, ma tajtx widen lil min kien iwissini.

¹⁴Kont wasalt biex nitlef kollox quddiem il-laqgħa tal-ġemgħa!”

¹⁵Ixrob l-ilma mill-bir tiegħek, u l-ilma ġieri min-nixxiegħa tiegħek.

¹⁶Trid l-ilma tal-għajn tiegħek jixxerred barra, u n-nixxigħat tal-ilma f’nofs it-triq?

¹⁷Żommhom għalik waħdek, isseħibx lil ħaddieħor miegħek.

¹⁸Tkun imbierka l-għajn tiegħek, mart żgħożitek! Ifraħ biha.

¹⁹Hi bħal ċerva għażiża, bħal għażżiela ħelwa[8]. Jimliek dejjem bl-għaxqa ż-żegħil tagħha, issaħħrek bla heda mħabbitha.

²⁰Għaliex tiġġennen, ibni, wara mara oħra, u tħaddan miegħek mara żienja?

²¹Quddiem il-Mulej l-imġiba tal-bniedem; il-Mulej jgħasses il-mixi kollu tiegħu.

²²Il-ħażin bi ħżunitu jinqabad, u bil-ħbula ta’ ħtijietu jintrabat;

²³jintemm minħabba n-nuqqas ta’ għaqal, jintilef minħabba l-bluha kbira tiegħu.