Read Maltese Bible with DC – IL-BIBBJA IL-KOTBA MQADDSA PROVERBJI 6 Bible Online

PROVERBJI 6 - Maltese Bible with DC – IL-BIBBJA IL-KOTBA MQADDSA bible

PROVERBJI 6

¹Ibni, jekk għamilt tajjeb għal ħaddieħor, jekk tajt rahan għal min hu barrani,

²jekk inqbadt bi kliem fommok, u tħabbilt b’xi wegħda li għamilt;

³agħmel dan, ibni, biex issalva, għax int waqajt f’idejn ħaddieħor; mur malajr, u ffittah,

⁴tagħtix mistrieħ lil għajnejk, lanqas irqad lil xfar għajnejk.

⁵Eħles bħal għażżiela mix-xibka, bħal għasfur minn id in-nassab.

⁶Mur għand in-nemla, ja għażżien, ara kif tgħix, u tgħallem minnha.

⁷M’għandhiex min hu fuqha, la għassies u lanqas ħakem;

⁸madankollu taħżen ikilha fis-sajf, tħejji għajxienha fi żmien il-ħsad.

⁹Kemm se ddum rieqed, ja għażżien? Meta se tqum minn ngħasek?

¹⁰Daqqa torqod, daqqa tongħos, daqqa tistrieħ b’idejk marbuta,

¹¹u jiġi fuqek bħal ħalliel il-faqar, u bħal wieħed ġellied l-għaks.

¹²Bniedem brikkun, min hu ħażin, jimxi bit-tagħwiġ ta’ kliemu:

¹³jegħmeż għajnejh, iħabbat riġlejh, jagħmel sinjali b’subgħajh,

¹⁴moħħu kif se jagħmel il-ħsara, il-ħin kollu jaqla’ l-ġlied.

¹⁵Għalhekk għal għarrieda tiġi fuqu l-ħsara, f’daqqa waħda jinqered u ma jqumx iżjed.

¹⁶Sitt ħwejjeġ jobgħod il-Mulej, sebgħa huma li ma jaħmilhomx:

¹⁷għajnejn merfugħa, ilsien giddieb, idejn li jxerrdu demm bla ħtija,

¹⁸qalb li trawwem ħsibijiet qarrieqa, riġlejn li jiġru ħfief għall-ħażen,

¹⁹fomm li jixhed bil-qerq il-gideb, u bniedem li jaqla’ l-ġlied bejn l-aħwa.

²⁰Ħares, ibni, ordnijiet missierek, u twarrbux tagħlim ommok.

²¹Żommhom dejjem marbutin ma’ qalbek, dendilhom madwar għonqok.

²²Huma jmexxuk fil-mixi tiegħek, iħarsuk meta tkun rieqed, ikellmuk meta tqum.

²³Għax l-ordni musbieħ u l-liġi dawl, u t-twiddib tat-tagħlim hu t-triq tal-ħajja.

²⁴Huma jħarsuk minn mart ħaddieħor, mill-kliem ħelu tal-mara mitlufa.

²⁵Tixxennaqx f’qalbek għal sbuħitha, tħallihiex taqbdek b’ħarset għajnejha.

²⁶Għax mara żienja b’biċċa ħobż tixtriha, iżda mara miżżewġa tiswielek ħajtek[9].

²⁷Jista’ xi ħadd iġorr in-nar f’ħobbu, u ħwejġu ma jinħarqulux?

²⁸Jista’ xi ħadd jimxi fuq il-ġamar, u saqajh ma jinxtwewlux?

²⁹Hekk jiġrilu min imur għand mart ħaddieħor; kull min jersaq lejha jpattiha qares.

³⁰Mhux kulħadd jistmell il-ħalliel, li jisraq biex jixba’ għax ikun bil-ġuħ?

³¹Jekk jinqabad, għal seba’ darbiet iħallas, ikollu jagħti l-ġid kollu ta’ daru.

³²Hekk min jiżni hu bniedem bla moħħ, jeqred lilu nnifsu min jagħmel hekk.

³³Swat u mistħija jkollu, u l-għajb tiegħu ma jitħassar qatt;

³⁴għax l-għira tgħaddab lil żewġha, li ma jaħfirhilux meta tiġih is-siegħa;

³⁵ma jilqa’ ebda tpattija; ebda ħlas, kbir kemm ikun kbir, ma jberrdu.