Read Maltese Bible with DC – IL-BIBBJA IL-KOTBA MQADDSA PROVERBJI 7 Bible Online

PROVERBJI 7 - Maltese Bible with DC – IL-BIBBJA IL-KOTBA MQADDSA bible

PROVERBJI 7

¹Ibni, ħares kliemi, u żomm ġo fik il-kmandamenti tiegħi.

²Ħares il-kmandamenti tiegħi u jkollok il-ħajja, għożż tagħlimi bħal ħabbet għajnek.

³Orbothom ma’ subgħajk, iktibhom fuq qalbek.

⁴Lill-għerf għidlu: “Inti ħija”, u lid-dehen sejjaħlu ħabib tal-qalb,

⁵biex huma jħarsuk mill-mara żienja, mill-mara barranija li ssaħħar bi kliemha.

⁶Kont qiegħed fit-tieqa ta’ dari, inħares mill-grada tat-tieqa,

⁷u rajt fost il-boloh, ilmaħt fost iċ-ċkejknin, żagħżugħ bla moħħ,

⁸għaddej mit-triq ħdejn il-kantuniera ta’ darha, miexi lejn in-naħa tad-dar tagħha,

⁹filgħaxija, fi tmiem il-jum, xħin kien dieħel il-lejl u joktor id-dlam.

¹⁰U ħarġet mara tiltaqa’ miegħu, liebsa ta’ żienja, qalbha kollha qerq.

¹¹Kollha storbju u bla sabar; m’għandhomx kwiet f’darha riġlejha;

¹²issa fit-triq, issa fil-pjazez, f’kull rokna ssibha tistenna.

¹³Qabditu u bisitu, u bil-wiċċ tost kollu qaltlu:

¹⁴“Kelli noffri sagrifiċċju tas-sliem[10], u llum raddejt il-wegħdiet tiegħi;

¹⁵għalhekk ħriġt niltaqa’ miegħek, ħriġt infittxek, u issa sibtek.

¹⁶Frixt l-għata fuq is-sodda tiegħi, lożor tal-kulur b’ħajt tal-Eġittu;

¹⁷fewwaħt soddti bil-mirra, u friexi bis-sabbâra u l-kannella.

¹⁸Ejja, ħa niskru bl-għaxqa tal-imħabba, nitpaxxew bl-imħabba sa filgħodu.

¹⁹Żewġi mhux qiegħed id-dar, telaq għal vjaġġ fil-bogħod;

²⁰ħa miegħu borża bil-flus; ma jiġix id-dar qabel il-qamar mimli.”

²¹Bi kliemha qarrieqi ħajritu, bil-kliem ħelu tagħha waqqgħetu.

²²Iblah li hu, mar warajha, bħal gendus sejjer għall-qatla, bħal ċerv marbut rabta sewwa,

²³sakemm vleġġa tinfidlu fwiedu; bħal għasfur jittajjar lejn ix-xibka, bla ma jaf li hemm ħajtu fin-nofs.

²⁴Għalhekk, issa, ibni, isma’ minni, agħti widen għal kliem fommi.

²⁵Tħallix qalbek titħajjar minn imġibitha, tilwix lejn triqatha;

²⁶għax ħafna huma li rebħet u waqqgħet, bla għadd dawk li hi qatlet.

²⁷Triq lejn qiegħ l-art hi darha, tieħdok lejn għamajjar il-mewt.