Read Maltese Bible with DC – IL-BIBBJA IL-KOTBA MQADDSA PROVERBJI 8 Bible Online

PROVERBJI 8 - Maltese Bible with DC – IL-BIBBJA IL-KOTBA MQADDSA bible

PROVERBJI 8

¹Mhuwiex isejjaħ l-għerf u d-dehen mhuwiex qiegħed jgħajjat?

²Fil-quċċata tal-għoljiet matul it-triq, qagħad l-għerf f’salib it-toroq,

³ħdejn il-bieb, quddiem il-belt, fid-daħla tal-bieb jgħajjat bil-qawwa:

⁴“Lilkom, nies, qiegħed insejjaħ, għall-bnedmin hi l-għajta tiegħi.

⁵Tgħallmu, ċkejknin[11], l-għaqal; nies bla moħħ, ifhmu daqsxejn.

⁶Isimgħu, għax ħwejjeġ kbar se ngħidilkom, kliem is-sewwa se joħroġ minn fommi;

⁷għax fommi jitkellem is-sewwa; u xufftejja jistmellu l-gideb.

⁸Kliem fommi hu kollu sewwa, ma fih ebda tidwir jew tagħwiġ.

⁹Kollu dritt għal min għandu d-dehen, kollu sewwa għal min għandu l-għerf.

¹⁰It-tagħlim tiegħi ilqa’, u mhux il-fidda, u l-għerf aktar mid-deheb safi;

¹¹għax l-għerf aħjar mill-qroll aħmar, mhu xejn ħdejh il-ħaġar prezzjuż.

¹²Jien, l-għerf, ngħix mal-għaqal, u nimxi bil-ħsieb u l-qjies.

¹³Il-biża’ tal-Mulej jobgħod il-ħażen. Kburija, ksuħat, għemejjel ħżiena, kliem ta’ ħsara jien nobgħodhom.

¹⁴Jiena għandi l-fehma u l-għaqal[12], jiena għandi d-dehen u l-qawwa.

¹⁵Bil-ħila tiegħi jsaltnu s-slaten, u l-mexxejja jagħmlu liġijiet tajba.

¹⁶Bil-ħila tiegħi jaħkmu l-ħakkiema, u l-kbarat imexxu l-art.

¹⁷Jiena nħobb lil min iħobbni, jien, min ifittixni jsibni.

¹⁸Tiegħi huma l-għana u l-ġieħ, il-ġid bla tarf u s-saħħa.

¹⁹Il-frott tiegħi aħjar mid-deheb fin, u d-dħul tiegħi aqwa mill-fidda magħżula.

²⁰Jien fit-triq tal-ġustizzja nimxi, mill-mogħdijiet tas-sewwa ngħaddi,

²¹nagħti l-ġid lil dawk li jħobbuni, u nimlielhom il-ħażniet tagħhom.

²²Il-Mulej kellu lili sa mill-bidu ta’ għemilu[13], sa minn qabel l-eqdem għemejjel tiegħu.

²³Sa minn dejjem twaqqaft, mill-bidu, qabel ma nbdiet id-dinja.

²⁴Kien għad m’hemmx l-ibħra l-kbar, meta tnissilt jien, kien għad m’hemmx għejun inixxu l-ilma;

²⁵qabel ma tqiegħdu l-muntanji, qabel l-għoljiet jien twelidt.

²⁶Kien għadu ma għamilx l-art bir-raba’ tagħha, u lanqas l-ewwel traba tal-art.

²⁷Meta ħejja s-smewwiet jien kont hemm, meta ħażżeż dawra fuq wiċċ il-baħar kbir,

²⁸meta saħħaħ is-smewwiet hemm fuq, u qiegħed fis-sod in-nixxigħat ta’ qiegħ il-baħar;

²⁹meta ħażżeż trufijiet il-baħar, biex l-ilmijiet ma jaqbżux trufhom; meta qiegħed sisien l-art,

³⁰jien kont[14] maġenbu bħala tfajjel, l-għaxqa tiegħu, jum wara ieħor, nitliegħeb il-ħin kollu quddiemu;

³¹nitliegħeb fuq l-art imħejjija għall-bnedmin, nitgħaxxaq b’ulied il-bnedmin.

³²U issa wliedi, isimgħu lili: henjin dawk li jimxu fi triqati.

³³Isimgħu t-tagħlim u tiksbu l-għerf, u twarrbux it-tagħlim.

³⁴Hieni l-bniedem li jismagħni, li jishar kuljum wara biebi, li jgħasses kuljum mal-għatba ta’ biebi;

³⁵għax min isib lili jsib il-ħajja, u jikseb l-imħabba tal-Mulej;

³⁶iżda min jitlef lili, hu jbati; kull min jobgħod lili jħobb il-mewt.”