Read Maltese Bible with DC – IL-BIBBJA IL-KOTBA MQADDSA KOĦÈLET 1 Bible Online

KOĦÈLET 1 - Maltese Bible with DC – IL-BIBBJA IL-KOTBA MQADDSA bible

KOĦÈLET 1

¹Kliem Koħèlet bin David, sultan f’Ġerusalemm[1].

²O frugħa tal-frugħat[2], jgħid Koħèlet. O frugħa tal-frugħat! Kollox frugħa!

³Xi qligħ għandu l-bniedem mit-taħbit tiegħu kollu, li jġarrab taħt ix-xemx?

⁴Ġenerazzjoni tmur u oħra tiġi, imma l-art tibqa’ għal dejjem.

⁵Ix-xemx titla’, ix-xemx tinżel, u tgħaġġel lejn mnejn titla’.

⁶Jonfoħ ir-riħ lejn in-Nofsinhar, u lejn it-Tramuntana jdur, u jerġa’ lura lejn it-tidwir tiegħu.

⁷Ix-xmajjar kollha lejn il-baħar jiġru, iżda ma jimteliex il-baħar bihom; mnejn ikunu bdew il-mixja tagħhom, ’l hemmhekk ix-xmajjar jerġgħu jmorru.

⁸Kollox fih it-taħbit tiegħu, u dan il-bniedem ma jasalx li jfissru; l-għajn ma tixbax tara, u ma timtela qatt bis-smigħ il-widna.

⁹Dak li ġa sar hu dak li għad isir, li ġara huwa dak li għad jiġri; xejn ġdid m’hemm taħt ix-xemx.

¹⁰Hemm xi ħaġa li fuqha tista’ tgħid: “Ara din ħaġa ġdida?” Le, din diġà kienet fiż-żminijiet qabilna.

¹¹La dak li sar qabilna ma niftakru, lanqas jiftakru dak li jsir warajna.

¹²Jien Koħèlet, kont Ġerusalemm, insaltan fuq Iżrael.

¹³U tajt ruħi biex infittex u nistħarreġ bl-għerf dak kollu li jsir taħt is-sema. Biċċa xogħol iebsa din li Alla ta ’l ulied il-bniedem biex jedhew fiha.

¹⁴Rajt l-għemejjel kollha li jsiru taħt ix-xemx, u ara x’sibt: kollox frugħa u ġiri wara r-riħ.

¹⁵L-imgħawweġ ma tistax tiddrittah, u n-nieqes ma tistax issib tarfu.

¹⁶Għedt bejni u bejn ruħi: “Ara, jien kbirt u geddist l-għerf, għaddejt lil ta’ qabli kollha f’Ġerusalemm; sirt midħla sewwa tal-għerf u x-xjenza.”

¹⁷Xħin imbagħad inxħett nistħarreġ l-għerf u x-xjenza, il-bluha u n-nuqqas ta’ moħħ, għaraft li dan ukoll hu ġiri wara r-riħ.

¹⁸Għax il-kotra tal-għerf iġġib ħafna tħassib, u aktar ma taf aktar għandek biex titnikket.