Read Maltese Bible with DC – IL-BIBBJA IL-KOTBA MQADDSA KOĦÈLET 10 Bible Online

KOĦÈLET 10 - Maltese Bible with DC – IL-BIBBJA IL-KOTBA MQADDSA bible

KOĦÈLET 10

¹Bħalma d-dubbien mejjet initten il-fwieħa fil-vażett, hekk il-fama kbira tal-għaref tgħarraqha ftit tal-bluha.

²Qalb l-għaref issuqu lejn il-lemin, u qalb l-iblah lejn ix-xellug.

³L-iblah ikun bla moħħ imqar xħin jimxi fit-triq; għal kull min jara jgħid: “Dak iblah”.

⁴Jekk jinkorla għalik il-kap tiegħek terħix postok, għax il-kalma twitti żbalji kbar.

⁵Rajt taħt ix-xemx dan l-għawġ, l-iżball li ġej minn min għandu s-setgħa:

⁶lill-boloh imlaħħqin fil-postijiet għolja; u n-nies li jinqalgħu qiegħda fil-baxx.

⁷Rajt ilsiera rekbin fuq iż-żwiemel, u nobbli jimxu fl-art bħall-ilsiera.

⁸Jekk tħaffer bir tista’ taqa’ fih, u jekk iġġarraf ħajt jista’ jigdmek serp.

⁹Jekk tqanqal il-ġebel tista’ titħaxxem bih, jekk tqatta’ l-ħatab tindarab bil-laqx.

¹⁰Jekk tixxellef il-lexxuna u ma ssinnhiex, trid tisforza aktar biex taqta’ biha; jiswa, mela, li żżomm għaqlek jaħdem.

¹¹Jekk is-serp jigdem qabel ma jkun imsaħħar, xejn ma jiswielu ’l min jaf isaħħru.

¹²L-għaref kliem fommu jiksiblu ġieħ, imma l-iblah ilsienu stess jeqirdu;

¹³il-bidu ta’ kliemu bluha, u t-tmiem tiegħu ġenn mill-ikreh.

¹⁴Imma l-iblah xorta jibqa’ jkattar kliemu. Il-bniedem ma jafx x’għad ikun, u xi jsir wara mewtu min jista’ jgħidlu?

¹⁵Jifnih lill-iblah it-taħbit tiegħu, għax lanqas sal-belt ma jaf imur.

¹⁶Jaħasra għalik, o art, li s-sultan tiegħek tifel, u l-kbarat tiegħek jisbħu jieklu.

¹⁷Ixxurtjat int, pajjiż, li s-sultan tiegħek bin in-nobbli, u l-kbarat tiegħek jieklu f’waqtu, kemm jeħtieġu u bla tbahrid.

¹⁸Għal għażż l-għajnejn jisfronda s-saqaf; għal għażż l-idejn joqtor l-ilma fid-dar.

¹⁹Biex jgħadduha tajjeb iħejju l-mejda, u l-inbid iferraħhom, u l-flus jagħmlu tajjeb għal kollox.

²⁰Tisħetx lis-sultan lanqas ġo qalbek, u tidgħix lis-setgħan lanqas fis-satra ta’ fejn torqod, għax l-għasafar tal-ajru għandhom mnejn iġorru leħnek, u t-tjur iwasslu kliemek.