Read Maltese Bible with DC – IL-BIBBJA IL-KOTBA MQADDSA KOĦÈLET 11 Bible Online

KOĦÈLET 11 - Maltese Bible with DC – IL-BIBBJA IL-KOTBA MQADDSA bible

KOĦÈLET 11

¹Ibgħat ħobżok fuq wiċċ il-baħar[13], għax wara żmien twil jerġagħlek lura.

²Qassmu f’sebat ishma, anzi fi tmienja, għax ma tafx xi ħsara tista’ tiġi fuq l-art.

³Jekk is-sħab ikun mgħobbi jagħmel ix-xita; u jekk siġra taqa’, lejn in-Nofsinhar jew it-Tramuntana, hemm fejn taqa’ tibqa’.

⁴Min jgħarrex għar-riħ ma jiżra’ qatt, u min jagħti kas tas-sħab ma jaħsadx.

⁵Bħalma ma tafx kif jidħol nifs il-ħajja fl-għadam f’ġuf ta’ mara tqila, hekk ukoll ma tafx l-għemil ta’ Alla li għamel kollox.

⁶Iżra’ filgħodu ż-żerriegħa tiegħek, u tagħtix mistrieħ lil idek filgħaxija, għax ma tafx liema tinbet, hux din jew l-oħra, jew jagħtux it-tnejn frott tajjeb xorta waħda.

⁷Ħelu tassew id-dawl, u għażiża għall-għajnejn id-dehra tax-xemx.

⁸Iva, jekk il-bniedem jgħix bosta snin, ħa jgawdihom kollha, ħa jiftakar ukoll li ħafna jkunu l-jiem mudlama; kulma jiġi mbagħad hu kollu frugħa.

⁹Thenna, o żagħżugħ, fir-rebbiegħa ta’ ħajtek, u ħa tkun ferħana qalbek f’jiem żgħożitek. Imxi wara t-taħbit ta’ qalbek, u wara l-għaxqa ta’ għajnejk. Iżda kun af li ta’ dan kollu jitolbok kont Alla fil-ħaqq tiegħu.

¹⁰Ħarrab ukoll minn moħħok it-tħassib, u żomm il-ħsara ’l bogħod minn ġismek; għax it-tfulija u ż-żgħożija buffura riħ.