Read Maltese Bible with DC – IL-BIBBJA IL-KOTBA MQADDSA KOĦÈLET 12 Bible Online

KOĦÈLET 12 - Maltese Bible with DC – IL-BIBBJA IL-KOTBA MQADDSA bible

KOĦÈLET 12

¹Ftakar f’min ħalqek f’jiem żgħożitek qabel ma jaslu jiem in-niket, u joqorbu s-snin li tgħid għalihom: “Xejn ma jogħġbuni”;

²qabel ma jiddallmu x-xemx u d-dawl[14], u l-qamar u l-kwiekeb, u s-sħab jerġa’ jidher wara x-xita;

³meta dawk li jgħassu d-dar jibdew jitriegħdu, meta l-qalbenin jitgħawġu, u jieqfu dawk li jitħnu, għax jonqsu fl-għadd, u jiddallmu dawk li jħarsu ’l barra mit-tieqa;

⁴meta l-bibien jingħalqu fuq it-triq, u l-ħoss tal-mitħna jonqos, u l-għana tal-għasfur jintefa, u kull għana jieqaf;

⁵meta kull telgħa tbażża’, u t-triq issir tkexkix, meta s-siġra tal-lewż tarmi ż-żahar, u l-ġrad jitqal fil-mixi; u l-kappara titlef gostha, għax il-bniedem imur id-dar tiegħu ta’ dejjem, u l-bekkejja jiġġerrew mat-toroq;

⁶qabel ma l-ħajta tal-fidda tinqata’, u l-musbieħ tad-deheb jitfarrak; qabel ma l-ġarra fuq l-għajn tinkiser, u t-tarjola fuq il-bir tinqasam;

⁷u t-trab jerġa’ jmur fl-art mnejn ġie, u n-nifs tal-ħajja jitlaq lejn Alla, minn fejn ġie.

⁸O frugħa tal-frugħat, jgħid Koħèlet, kollox frugħa.

⁹Barra milli kien għaref, Koħèlet għallem l-għerf lill-poplu; b’ħafna ħsieb u tiftix niseġ kotra ta’ proverbji.

¹⁰Koħèlet fittex li jsib qwiel sbieħ u li jikteb bir-reqqa kliem is-sewwa.

¹¹Kliem l-għorrief hu bħal xpruni, bħal puntali sodi l-ġabriet ta’ qwielhom; ilkoll mogħtija minn ragħaj wieħed.

¹²Aktar minn daqshekk, ibni, m’għandekx xi tridu; għax il-kotba joktru bla heda, u l-istudju żejjed jgħajji l-ġisem.

¹³Hawn hu l-qofol tad-diskors[15] wara li nstama’ kollox: “Ħobb lil Alla u ħares il-kmandamenti tiegħu, għax f’dan jinġabar il-bniedem kollu.”

¹⁴Għax Alla jġib għall-ħaqq tiegħu l-għemejjel kollha, sal-inqas ħaġa moħbija, sew tajba u sew ħażina.