Read Maltese Bible with DC – IL-BIBBJA IL-KOTBA MQADDSA KOĦÈLET 7 Bible Online

KOĦÈLET 7 - Maltese Bible with DC – IL-BIBBJA IL-KOTBA MQADDSA bible

KOĦÈLET 7

¹Aħjar fama tajba miż-żejt prezzjuż[6], aħjar jum il-mewt minn jum it-twelid.

²Aħjar tmur f’dar il-vistu milli f’dar fejn hemm festa; għax hemm il-ħaj iġib f’moħħu kif dak hu tmiem il-bniedem.

³Aħjar wiċċ imnikket milli daħkan, għax b’niket il-wiċċ titjieb il-qalb.

⁴Qalb l-għorrief tkun f’dar il-vistu, u qalb il-boloh f’dar il-ferħ.

⁵Aħjar tisma’ ċ-ċanfir tal-għaref, milli tisma’ l-għana tal-boloh:

⁶għax bħaċ-ċaqċiq tax-xewk jaqbad taħt il-borma, hekk id-daħka tal-iblah. Imma dan ukoll hu frugħa,

⁷għax il-moħqrija tħawwad moħħ l-għaref, u r-rigali jħassrulu qalbu.

⁸Aħjar ittemm ħaġa milli tibdieha, aħjar tistabar milli titkabbar.

⁹Tħallix il-korla tikbes malajr f’qalbek, għax f’qalb il-boloh tbejjet il-korla.

¹⁰Tistaqsix: “Kif inhi li ż-żminijiet ta’ dari kienu aħjar minn tal-lum?” Mhix ta’ għaref mistoqsija bħal din.

¹¹Tajjeb l-għerf flimkien mal-ġid, u jiswa għal min jara dawl ix-xemx.

¹²Fih kenn l-għerf u fihom kenn il-flus; imma aħjar l-għerf għax iħarreġ għall-ħajja lil min għandu lilu.

¹³Ħares lejn għemil Alla: jista’ xi ħadd jiddritta dak li Hu għamel mgħawweġ?

¹⁴F’jum ir-risq[7] fittex gawdi u f’jum l-għawġ oqgħod aħseb: l-għawġ u r-riżq qassamhom Alla biex il-bniedem xejn ma jikxef dwar il-ġejjieni tiegħu.

¹⁵Minn kollox rajt matul il-ħajja fiergħa tiegħi: mill-ġust li jmut minkejja tjubitu sal-ħażin li jtawwal għomru minkejja ħżunitu.

¹⁶La għandek tkun ġust iżżejjed u lanqas għaref bil-bosta. Għalfejn toqgħod tinfena?

¹⁷Tkunx ħażin iżżejjed u tagħtihiex għall-bluha. Għala trid tmut qabel jasallek il-waqt?

¹⁸Tajjeb iżżomm din it-twissija bla ma titlaq lill-oħra, għax min jibża’ minn Alla jmur tajjeb mat-tnejn.

¹⁹L-għerf jagħti qawwa lill-għaref aktar minn għaxra bis-setgħa fil-belt.

²⁰B’danakollu ma ssibx bniedem ġust fid-dinja li jagħmel is-sewwa bla ma jaqa’ f’xi ħtija[8].

²¹Ħaġ’oħra: tagħtix widen għall-għajdut kollu tan-nies li ma tmurx tisma’ l-qaddej tiegħek jidgħilek ħażin fuqek,

²²għax qalbek stess tgħidlek li kemm-il darba int ukoll dgħajt lil ħaddieħor.

²³Dan kollu ġarrabtu bl-għerf għax għedt: “Irrid nifhmu”. Imma kemm għadni lura!

²⁴Kulma jeżisti qiegħed fil-bogħod, u kulma hu fil-fond, hu fil-fond ħafna. Min jista’ jilħqu?

²⁵Imma rġajt qtajtha li nikseb tagħrif u ngħarblu sewwa ħa nsib l-għerf u r-raġuni għala l-ħażen hu nuqqas ta’ għaqal u l-bluha ġenn.

²⁶U nsib dan: li aktar morra mill-mewt hi l-mara; hi nassa minn fuq s’isfel, qalbha xibka u dirgħajha ktajjen. Min jogħġob ’l Alla jaħrab minnha, iżda l-midneb jibqa’ maqbud minnha.

²⁷“Ara x’sibt,” jgħid Koħèlet “wara li flejt ħaġa b’ħaġa biex insib tarf il-problema

²⁸u għadni nfittex u ma sibtux: raġel f’elf sibtu, iżda mara fost in-nisa ma sibtx waħda[9]”

²⁹Ara dan biss sibt: li Alla għamel il-bniedem dritt, iżda huma jfittxu tagħwiġ bla għadd[10].