Read Maltese Bible with DC – IL-BIBBJA IL-KOTBA MQADDSA KOĦÈLET 8 Bible Online

KOĦÈLET 8 - Maltese Bible with DC – IL-BIBBJA IL-KOTBA MQADDSA bible

KOĦÈLET 8

¹Min hu bħall-għaref li jaf iħoll problema? L-għerf idawwal wiċċ il-bniedem u jneħħilu ebusitu.

²Ħares l-ordni tas-sultan ukoll minħabba l-ħalfa quddiem Alla.

³Tgħaġġilx titlaq minn quddiem is-sultan, u twebbisx rasek f’ħaġa ħażina.

⁴Għax il-kelma tas-sultan fuq kollox qiegħda, u min se jindaħallu f’dak li jagħmel?

⁵Min jobdi l-liġi f’ebda għawġ ma jsib ruħu. Jaf tajjeb moħħ l-għaref li hemm waqt u ħaqq:

⁶u tabilħaqq għal kull ħaġa hemm il-waqt u l-ħaqq, waqt li ħsarat kbar huma mdendla fuq il-bniedem.

⁷Għax hu ma jafx x’se jkun il-ġejjieni, u min jaf jgħidlu meta se jkun?

⁸L-ebda bniedem mhu sid ta’ nifs ħajtu biex iżommu, u ħadd mhu sid il-jum ta’ mewtu; mit-taqbida ħadd ma jeħlisha, lanqas il-ħażen ma jeħles lil min jagħmlu.

⁹Dan kollu rajt jien u naħseb fl-għemil kollu li jsir taħt ix-xemx meta bniedem jaħkem fuq ieħor u jagħmillu l-ħsara.

¹⁰Għaldaqstant jien rajt jindifnu l-ħżiena. Dawn kienu deħlin u ħerġin is-santwarju, u mfaħħrin fil-belt fejn kienu għamlu ħwejjeġ bħal dawn. Dan ukoll hu frugħa.

¹¹Għax l-għemejjel tal-ħżiena ma jeħdux minnufih il-kundanna li jkun jistħoqqilhom; għalhekk qalb il-ħżiena titħajjar ħafna biex tagħmel id-deni;

¹²għax il-ħażin, imqar jidneb mitt darba, idum jgħix ħafna.

¹³Iżda naf fiż-żgur li jkollhom l-hena dawk li jibżgħu minn Alla talli jgħixu fil-biża’ tiegħu; u li ma jkollux hena l-ħażin u lanqas itawwal bħal dell jiem ħajtu għax m’għandux il-biża’ ta’ Alla.

¹⁴Iżda fuq l-art tinsab frugħa oħra; hemm nies ġusti li jieħdu l-ħlas li jmiss l-għemejjel tal-ħżiena, u hemm nies ħżiena li jieħdu l-ħlas li jmiss l-għemejjel tal-ġusti. Jiena ngħid: “Dan ukoll hu frugħa.”

¹⁵Għalhekk jien infaħħar it-tgawdija, għax il-bniedem m’għandux hena ieħor taħt ix-xemx ħlief li jiekol u jixrob, u jkun ferħan; ħa jkunu dawn sħabu fit-taħbit tiegħu tul l-għomor li Alla jagħtih taħt ix-xemx.

¹⁶Meta ntfajt biex nikseb l-għerf osservajt l-għemejjel li fihom jedha l-bniedem fuq l-art bla ma jistrieħ, la billejl u lanqas binhar.

¹⁷Rajt dwar l-għemil kollu ta’ Alla kif il-bniedem ma jistax isib tarf ta’ kulma jsir taħt ix-xemx; jitħabat kemm jitħabat biex ifittex, ma jasalx biex isibu; lanqas l-għaref, li jaħseb li jaf xi ħaġa, ma jista’ jsib xejn.