Read Maltese Bible with DC – IL-BIBBJA IL-KOTBA MQADDSA KOĦÈLET 9 Bible Online

KOĦÈLET 9 - Maltese Bible with DC – IL-BIBBJA IL-KOTBA MQADDSA bible

KOĦÈLET 9

¹Jien dan kollu qistu u fhimtu tajjeb, li l-ġusti u l-għorrief bl-għemejjel tagħhom kollha huma f’idejn Alla; jekk hux imħabba jew mibegħda ma jafux x’ħaqqhom. It-tnejn huma quddiemhom!

²Għax xorti waħda hemm għal kulħadd, sew għat-tajjeb sew għall-ħażin, sew għas-safi sew għall-imniġġes, sew għal min joffri s-sagrifiċċju, sew għal min ma joffrix, sew għall-ġust sew għall-midneb, sew għal min jaħlef sew għal min jibża’ mill-ħalf.

³U hawn hu l-gwaj f’kulma jiġri taħt ix-xemx, li xorti waħda hemm għal kulħadd[11]; u biex tkompli tagħqad, qalb il-bniedem mimlija ħażen, u l-bluha tul għomorhom kollu tgħammar fihom, biex imbagħad imorru mal-mejtin.

⁴Min għadu msieħeb mal-ħajjin fadallu tama: għax “aħjar kelb ħaj minn iljun mejjet”.

⁵Il-ħajjin, għallinqas, jafu li għad imutu, iżda l-mejtin ma jafu xejn; lanqas ħlas ma baqa’ għalihom għax imqar it-tifkira tagħhom intesiet.

⁶L-imħabba tagħhom, il-mibegħda u l-għira li kellhom, issa ntemmu u l-ebda sehem ma jkollhom aktar f’dak kollu li jsir taħt ix-xemx.

⁷Isa, mela, kul bil-ferħ il-ħobża tiegħek, u ixrob għal qalbek l-inbid tiegħek, għax Alla ġa laqagħhom l-għemejjel tiegħek.

⁸Ħa jkunu f’kull żmien bojod ilbiesek, qis li l-fwieħa fuq rasek ma tonqosx.

⁹Gawdi l-ħajja ma’ martek l-għażiża, il-jiem kollha ta’ ħajtek fiergħa, li Alla silfek taħt ix-xemx, għax dan hu sehmek mill-ħajja u mit-taħbit li inti ġġarrab taħt ix-xemx.

¹⁰Kulma ssib x’tagħmel, agħmlu b’ħiltek kollha għax ma jkunx hemm ħidma jew ħsieb, xjenza jew għerf, f’Art l-Imwiet fejn inti sejjer.

¹¹Rajt ukoll taħt ix-xemx li ma tintrebaħx mill-ħfief it-tiġrija, lanqas mill-felħana t-taqbida. Mhuwiex tal-għorrief il-ħobż jew ta’ min jifhem il-ġid; lanqas ta’ min jinqala’ s-suċċess, iżda f’kollox jidħol iż-żmien u ċ-ċirkustanzi.

¹²Il-bniedem ma jafx xħin tasal sigħetu[12]: bħall-ħut li jidħol f’xibka qarrieqa, bħat-tajr li jinqabad fix-xbiek, hekk jinqabdu l-bnedmin minn siegħa ħażina xħin tiġi fuqhom għal għarrieda.

¹³Rajt ukoll taħt ix-xemx dan il-każ li laqatni ħafna.

¹⁴Kien hemm belt żgħira bi ftit nies jgħammru fiha u sultan kbir mar jaħbat għaliha. Dawwarha b’assedju u talla’ madwarha torrijiet għolja.

¹⁵Mela jkun hemm fiha raġel fqir iżda għaref, u bil-ħila ta’ moħħu rnexxielu jeħles il-belt; b’danakollu ħadd ma baqa’ jiftakru ’l dak il-fqir.

¹⁶Imbagħad jien għedt: “Tassew li l-għerf aħjar mis-saħħa; b’danakollu l-għerf tal-fqir jistmerruh u għal kliemu ma jagħtux widen.

¹⁷Jinstama’ aħjar kliem l-għorrief imlissen bil-kalma, mill-ħafna għajjat ta’ kmandant fost il-boloh.

¹⁸Aħjar l-għerf mill-armi tal-gwerra, iżda żball wieħed jista’ jgħarraq ġid kbir.