Read Maltese Bible with DC – IL-BIBBJA IL-KOTBA MQADDSA L-GĦANJA TAL-GĦANJIET 3 Bible Online

L-GĦANJA TAL-GĦANJIET 3 - Maltese Bible with DC – IL-BIBBJA IL-KOTBA MQADDSA bible

L-GĦANJA TAL-GĦANJIET 3

¹Matul il-lejl fuq soddti jien fittixt lil dak li qalbi tħobb. Fittixtu; ma sibtux!

²“Ħa nqum, għalhekk, u mmur indur mal-belt, u fit-triqat u l-pjazez noqgħod infittex il-maħbub ta’ qalbi.” Fittixtu; ma sibtux!

³Iltaqgħu miegħi mbagħad in-nies tal-għassa, dawk li mal-belt iduru. Rajtuh xejn lill-maħbub ta’ qalbi?

⁴Bilkemm ilħaqt għaddejthom li ma sibtx lill-maħbub ta’ qalbi. Żammejtu, u le ma nitilqu, qabel ma nkun daħħaltu fid-dar t’ommi, fil-kamra wkoll ta’ dik illi nisslitni.

⁵Bniet ta’ Ġerusalemm, nitlobkom b’ħerqa, f’ġieħ l-għażżiela jew iċ-ċriev tar-raba’, la tqajmux, le, la tqajmux l-imħabba, qabel ma jogħġob lilha.

⁶X’inhuwa dan li tiela’ mid-deżert, bħal sħaba ta’ duħħan, mimli bir-riħa tfuħ ta’ mirra u inċens, b’kull fwieħa tal-merkanti?

⁷Ara, il-lettiga, dik ta’ Salamun[12]! Sittin raġel qalbiena hemm madwarha, magħżula minn fost l-aqwa ta’ Iżrael.

⁸Ilkoll kemm huma jħaddmuh sewwa s-sejf imħarrġin sew fil-gwerra. Kull wieħed minnhom għandu s-sejf fuq ġenbu, għall-biża’ ta’ xi ħasda tul il-lejl.

⁹Is-sultan Salamun għalih innifsu tron għamel mill-injam tal-Libanu.

¹⁰Tal-fidda għamilhom il-kolonni tiegħu, id-dahar u l-ġnub tad-deheb, is-siġġu ksieh bil-porpra, l-isfond intarsjat bl-ebbanu ġo fih.

¹¹Ejjew, bniet ta’ Ġerusalemm, ejjew, araw, bniet ta’ Sijon, is-sultan Salamun, b’dik il-kuruna li xidditlu ommu nhar l-għerusija tiegħu, fil-jum tal-ferħ ta’ qalbu.