Read Maltese Bible with DC – IL-BIBBJA IL-KOTBA MQADDSA L-GĦANJA TAL-GĦANJIET 4 Bible Online

L-GĦANJA TAL-GĦANJIET 4 - Maltese Bible with DC – IL-BIBBJA IL-KOTBA MQADDSA bible

L-GĦANJA TAL-GĦANJIET 4

¹Kemm int sabiħa, maħbuba tiegħi, kemm int sabiħa! Għajnejk qishom ħamiem minn wara l-istar tiegħek. Dak xagħrek merħla mogħoż imewġu mal-muntanji ta’ Gilgħad.

²Dawk snienek qishom merħla nagħaġ imġiżża telgħin wara l-ħasil. Kull waħda minnhom hemm tewmija magħha, ma hemm mingħajrha ebda waħda minnhom.

³Ħajta ħamra dagħmiena huma xufftejk, id-diskors tiegħek ħelu. Ħaddejk biċċtejn rummien[13] minn wara l-istar tiegħek.

⁴Għonqok, torri ta’ David, li nbena ħalli fih jintrefgħu l-armi. Elf tarka hemm fih imdendla, tarkiet tal-qalbenin, ilkoll kemm huma.

⁵Jixbah lil żewġt ifrieħ taċ-ċerva sidrek, ulied tewmin t’għażżiela, li jirgħu qalb il-ġilji.

⁶Qabel ma taqa’ s-sirda u d-dellijiet jaħarbu, lejn il-muntanja rrid immur tal-mirra, lejn tal-inċens l-għoljiet.

⁷Kollok sabiħa, maħbuba tiegħi[14], u tebgħa fik ma hemmx!

⁸Ejja minn fuq il-Libanu, għarusa tiegħi, ejja mil-Libanu għad-daħla tiegħek. Ħares minn fuq il-qċaċet ta’ Amana, minn fuq dawk ta’ Senir u ta’ Ħermon, minn dawk l-għerien tal-ljuni, muntanji tal-ljupardi.

⁹Inti sraqtli lil qalbi, għarusa tiegħi, inti sraqtli lil qalbi, oħti, sa b’ħarsa waħda tiegħek, sa b’waħda biss mill-ġawhar ta’ fuq għonqok!

¹⁰Imħabbtek kemm hi ħelwa, oħti[15], għarusa, kemm hi aħjar imħabbtek mill-inbid! Riħet fwiħatek oħla minn kull balzmu!

¹¹Xufftejk, għarusa tiegħi, iqattru għasel safi[16], u taħt ilsienek għasel u ħalib. Riħet l-ilbiesi tiegħek bħal dik tal-Libanu.

¹²Ġnien magħluq tajjeb[17] int, oħti, għarusa tiegħi, ġnien magħluq tajjeb, għajn issiġillata.

¹³Jinbet ġnien tar-rummien minn ilmijietek, flimkien mal-ogħla ħxejjex: il-ward tal-ħenna, u l-ispika,

¹⁴spika u żagħfran, qasab ifuħ, kannella, kull siġra tal-inċens, mirra, sabbara, u l-aqwa balzmi kollha.

¹⁵Int għajn tal-ġonna, int ġiebja tilma ġieri, nieżel mil-Libanu!

¹⁶Qum, Tramuntana, riħ isfel, ejja, onfoħ fuq il-ġnien tiegħi, ħalli s-siġar tal-balzmu tiegħu jqattru! Ħa jiġi l-maħbub tiegħi fil-ġnien tiegħu u jiekol mill-frott tiegħu kollu benna!