Read Maltese Bible with DC – IL-BIBBJA IL-KOTBA MQADDSA L-GĦANJA TAL-GĦANJIET 6 Bible Online

L-GĦANJA TAL-GĦANJIET 6 - Maltese Bible with DC – IL-BIBBJA IL-KOTBA MQADDSA bible

L-GĦANJA TAL-GĦANJIET 6

¹Fejn mar il-maħbub tiegħek[20], l-isbaħ fost in-nisa? Fejn mar il-maħbub tiegħek, biex aħna nfittxuh miegħek?

²Il-maħbub tiegħi niżel fil-ġnien tiegħu, ħdejn il-ħmiemel tal-balzmu, ħalli fil-ġonna jirgħa, u jaqta’ l-ġilji.

³Jien tal-maħbub, u tiegħi l-maħbub tiegħi li jirgħa qalb il-ġilji.

⁴Int ħelwa, bħal Tirsa, maħbuba tiegħi[21], inti sabiħa, bħal Ġerusalemm.

⁵Dawwar għajnejk minn fuqi, għax isaħħruni. Dak xagħrek merħla mogħoż, imewġu mal-muntanja ta’ Gilgħad.

⁶Dawk snienek merħla nagħaġ telgħin wara l-ħasil. Kull waħda minnhom hemm tewmija magħha, ma hemm mingħajrha ebda waħda minnhom.

⁷Ħaddejk biċċtejn rummien minn wara l-istar tiegħek.

⁸Irġejjen hemm sittin, tmenin hemm konkubini, xebbiet bla għadd.

⁹Imma waħda biss il-ħamiema tiegħi, waħda l-perfetta tiegħi. Hi l-waħdanija t’ommha, hi biss l-għażiża ta’ dik li wilditha. Rawha x-xebbiet, qalulha li hi hienja, irġejjen, konkubini, ilkoll faħħruha:

¹⁰“Min hija dik li tielgħa bħaż-żerniq, sabiħa donnha l-qamar, tiddi bħax-xemx, tal-biża’ bħall-eżerċtu lest għat-taqbida?”

¹¹Fil-ġnien tal-ġewż inżilt, sabiex inħares lejn tal-wied il-ħdura, biex nara jekk id-dielja hix qed tarmi, jekk ir-rummien diġà ħariġx in-nwar.

¹²Jien stess ma nafx, imma refgħetni xewqti għal fuq il-karru flimkien mal-prinċep.