Read Maltese Bible with DC – IL-BIBBJA IL-KOTBA MQADDSA IL-KTIEB TAL-GĦERF 10 Bible Online

IL-KTIEB TAL-GĦERF 10 - Maltese Bible with DC – IL-BIBBJA IL-KOTBA MQADDSA bible

IL-KTIEB TAL-GĦERF 10

¹L-ewwel bniedem li nħalaq missier id-dinja, ħarsu l-għerf, meta kien għadu waħdu; qajmu mill-waqgħa tiegħu,

²u tah il-qawwa li jaħkem fuq kollox.

³Iżda malli dak il-ħażin fl-għadab tiegħu tbiegħed minnu, intilef fis-saħna tiegħu u qatel lil ħuh.

⁴Meta mbagħad minħabba fih tgħerrqet l-art, l-għerf ħelisha mill-ġdid, billi mexxa lill-ġust fuq daqsxejn ta’ laqxa.

⁵Kien l-għerf li meta l-ġnus kienu mgħaddsa fil-ħażen, għażel raġel ġust u żammu bla tebgħa quddiem Alla, żammu sod minkejja mħabbtu għal ibnu.

⁶Meta l-ħżiena kienu se jinqerdu, l-għerf ħeles wieħed ġust minn fosthom, u ħarab hu u nieżel in-nar fuq il-ħamest ibliet.

⁷Hemm, b’xhieda tal-ħażen tagħhom, għad baqa’ ħerba ddaħħan, u siġar li qatt ma jsajru frotthom; hemm ukoll wieqaf plier tal-melħ, b’tifkira għal min ma jemminx.

⁸Talli huma telqu l-għerf, mhux biss iċċaħħdu mit-tagħrif tat-tajjeb, imma ħallew ukoll lid-dinja tifkira ta’ bluhathom, biex qatt ma jistgħu jistaħbew minn ħtijiethom.

⁹Iżda ’l dawk li qdewh, l-għerf ħelishom mit-taħbit.

¹⁰Lill-ġust, li ħarab mill-għadab ta’ ħuh, l-għerf mexxieh minn toroq dritti, wrieh is-saltna ta’ Alla, u għarrfu l-ħwejjeġ qaddisa tiegħu; ġiebu ’l quddiem f’xogħlu, u kattarlu frott ħidmietu.

¹¹Hu waqaf miegħu kontra r-regħba ta’ min kien jgħakksu, u mlieh bl-għana.

¹²Ħarsu mill-għedewwa tiegħu, u saħħu kontra l-insib tagħhom, ħarġu rebbieħ fit-taqbida qalila, biex għallmu li t-tjieba hi aqwa minn kollox.

¹³Lill-ġust, li ġie mibjugħ, l-għerf ma telqux, imma ħelsu mid-dnub.

¹⁴Sa fil-ħabs niżel miegħu, ma telqux fl-irbit tal-ktajjen, sakemm ġieblu x-xettru tas-saltna, u tah is-setgħa fuq dawk li ħaqruh; lil dawk li xlewh ħariġhom ta’ giddieba, u tah ġieħ għal dejjem.

¹⁵Lill-poplu qaddis, nisel bla ħtija, l-għerf ħelsu minn ġens li kien jaħqru.

¹⁶Hu daħal f’wieħed qaddej tal-Mulej; li b’sinjali u għeġubijiet waqaf lil slaten tal-biża’.

¹⁷Ta lill-qaddisin il-ħlas tat-taħbit tagħhom, mexxiehom minn triq tal-għaġeb, kien għalihom kenn binhar, u ħuġġieġa ta’ kwiekeb billejl.

¹⁸Għaddiehom mill-Baħar l-Aħmar mexxiehom minn ġo ilma għoli,

¹⁹imma l-għedewwa tagħhom għerriqhom, tellagħhom mill-qiegħ u rmiehom.

²⁰Għalhekk it-tajbin żarmaw il-ħżiena; imbagħad għannew, Mulej, lill-isem imqaddes tiegħek, u faħħru għalenija ’l idek, li tathom ir-rebħa.

²¹Għax l-għerf fetaħ fomm l-imbikkma, u ħall l-ilsna tat-trabi.