Read Maltese Bible with DC – IL-BIBBJA IL-KOTBA MQADDSA IL-KTIEB TAL-GĦERF 12 Bible Online

IL-KTIEB TAL-GĦERF 12 - Maltese Bible with DC – IL-BIBBJA IL-KOTBA MQADDSA bible

IL-KTIEB TAL-GĦERF 12

¹Għax f’kulħadd hemm nifsek bla ma qatt jintemm.

²Għalhekk int twiddeb bil-ftit il-ftit lil dawk li jonqsu, twissihom u tfakkarhom fejn dinbu, biex jerġgħu lura mill-ħażen tagħhom, u fik, Mulej, iqiegħdu t-tama tagħhom.

³Hekk int ’il dawk li dari kienu jgħammru fl-art imqaddsa tiegħek,

⁴stmellejthom minħabba l-għemejjel koroh tagħhom, għax kienu jagħmlu sħarijiet u riti ħżiena.

⁵Joqtlu lil uliedhom bla ħniena[15], jieklu l-ġewwieni u l-laħam tal-bniedem, u jiskru fir-riti tal-misteri;

⁶u dawk il-ġenituri qattiela ta’ wliedhom bla saħħa, int ridt teqridhom b’idejn missirijietna,

⁷biex art l-aktar għażiża għalik tilqa’ fiha lil ulied Alla, bħala nies li jixirqulha.

⁸Imma ’l dawn ukoll, għax bnedmin huma, int ħfirtilhom; bgħattilhom iż-żnażan qabel l-eżerċtu tiegħek, biex jeqirduhom bil-mod il-mod.

⁹M’hux għax ma stajtx ixxejjen il-ħżiena f’taqbida mat-tajbin, jew teqridhom f’salt wieħed b’bhejjem tal-biża’ jew b’kelma iebsa.

¹⁰Imma meta kont tikkundannahom bil-ftit il-ftit, kont żmien tagħtihom għall-indiema. Int kont taf tajjeb li nisilhom ħażin, u li għeruqha fil-fond ħżunithom, u li qatt ma kienu se jibdlu fehmithom;

¹¹għax huma nisel misħut sa mill-bidu. Mhux għax bżajt minn xi ħadd, int ħfirthielhom għal dnubiethom.

¹²Lilek min jista’ jgħidlek: “Hemm x’għamilt?” u min jista’ jieqaf lid-digriet tiegħek? Min jista’ jlumek jekk teqred il-ġnus li inti ħlaqt? Min se jqum kontrik biex jaqbeż għan-nies ħżiena?

¹³Għax m’hemmx alla ieħor ħliefek, li jieħu ħsieb kollox, biex ikollok turih li ma qtajtx il-ħaqq ħażin.

¹⁴L-ebda sultan jew mexxej ieħor ma jista’ jiqaflek favur dawk li int ikkundannajt.

¹⁵Imma int, għax inti ġust, kollox tmexxi bis-sewwa; ma tqishiex tixraq lil setegħtek tikkundanna ’l min hu bla ħtija.

¹⁶Għax is-setgħa tiegħek hi l-għajn tal-ġustizzja, u, għax int Sid ta’ kollox, lil kulħadd tagħder.

¹⁷Int turi saħħtek ma’ min ma jemminx fil-kobor ta’ setegħtek: u trażżan ’il dawk li, għalkemm jafuha, iqumu kontriha.

¹⁸Għax sid il-qawwa, int tagħmel il-ħaqq bil-ħniena; lilna tmexxina b’tjieba kbira. Għalkemm għandek is-setgħa, issibha wkoll meta tridha.

¹⁹B’dan l-għemil int għallimt lill-poplu tiegħek, li l-ġust għandu jkun twajjeb. Din hi t-tama sabiħa li inti tajt lil uliedek, li inti tagħti żmien għall-indiema ta’ dnubiethom.

²⁰Jekk b’daqshekk ħsieb u tjieba, int għakkist l-għedewwa tal-qaddejja tiegħek li kien ħaqqhom il-mewt, billi tajthom żmien u ħin li jħallu ħżunithom,

²¹b’kemm akbar reqqa għamilt ħaqq minn uliedek, wara li b’ħalfa tajt lil missirijiethom il-patt, kollu wegħdiet ta’ ġid?

²²Lilna, iva, twiddibna, imma elf darba aktar issawwat lill-għedewwa, biex naħsbu fi tjubitek, meta aħna wkoll niġġudikaw, u, meta niġu ġġudikati, nistennew il-ħniena.

²³Għalhekk dawk il-ħżiena, li għaddew ħajjithom fil-bluha, int għakkisthom bl-għemejjel tagħhom stess ta’ min jistmellhom.

²⁴Huma tbiegħdu żżejjed fi triq l-iżball, meta laqgħu b’allat bhejjem fiergħa u moqżieża; huma tqarrqu bħal tfal żgħar bla sens.

²⁵Għalhekk, qishom kienu tfal bla sens, int tajthom kastigi li waqqgħuhom għaż-żufjett.

²⁶Imma dawk li ma jitgħallmux b’kastig taż-żufjett, ikollhom joqogħdu għall-ħaqq li jaf jagħti Alla.

²⁷Ħaduha bi kbira fit-tbatijiet tagħhom, għax inħaqru b’dawk stess li huma qisuhom allat tagħhom. Imbagħad Dak li qabel ma ridux jafu bih, rawh u għarfuh li hu Alla tassew. Hekk ġiet fuqhom l-eħrex kundanna.