Read Maltese Bible with DC – IL-BIBBJA IL-KOTBA MQADDSA IL-KTIEB TAL-GĦERF 14 Bible Online

IL-KTIEB TAL-GĦERF 14 - Maltese Bible with DC – IL-BIBBJA IL-KOTBA MQADDSA bible

IL-KTIEB TAL-GĦERF 14

¹Wieħed ilesti biex isiefer, u jaħseb biex jaqsam imwieġ qalila, isejjaħ l-għajnuna ta’ biċċa laqxa aktar dgħajfa mill-ġifen li jġorru.

²Għax il-ġifen sar bix-xewqa ta’ qligħ il-flus, u r-raġel tas-sengħa ħadmu b’għerfu.

³Imma l-providenza tiegħek, Missier, tmexxih; għax int ftaħt triq fil-baħar ukoll, u mogħdija bla periklu qalb l-imwieġ.

⁴Hekk turi li int tista’ teħles minn kull tiġrif, biex ukoll min ma jifhimx jista’ jbaħħar.

⁵Inti ma tridx li għemil l-Għerf tiegħek ikun għal xejn; għalhekk il-bnedmin jafdaw ħajjithom fuq għuda dgħajfa, u jaqsmu, qawwijin u sħaħ, imwieġ kbar fuq ċattra.

⁶Hekk ukoll, meta kienu qegħdin jinqerdu l-ġganti l-kbar, fuq dgħajsa skansat it-tama tad-dinja u, immexxija minn idek, ħalliet lid-dinja żerriegħa ta’ nisel ġdid.

⁷Imbierka l-għuda li biha jsir il-ġid!

⁸Imma l-idolu, maħdum minn għuda b’id il-bnedmin, misħut hu u min għamlu; wieħed għaliex ħadmu u l-ieħor għaliex ħaġa tintemm semmewha alla.

⁹Għax Alla jobgħod xorta waħda l-ħażen u ’l min jagħmlu;

¹⁰l-idolu u ’l min ħadmu jikkastigahom it-tnejn.

¹¹Għalhekk jasal ukoll żmien iż-żjara fuq allat il-ġnus, għax saru ħwejjeġ mistkerrha fost il-ħlejjaq ta’ Alla; huma tfixkil għall-erwieħ tal-bniedem, u nassa għal riġlejn il-boloh.

¹²Il-ħsieb li jsiru l-idoli kien il-bidu taż-żina; u l-ħajja tħassret għax daħlu huma.

¹³Fil-bidu huma ma kinux u lanqas jibqgħu għal dejjem.

¹⁴Daħlu fid-dinja bil-frugħa tal-bniedem; għalhekk tmiem ħesrem hemm lest għalihom.

¹⁵Xi missier, imnikket għall-mewt ħesrem ta’ ibnu, għamel xbieha tiegħu, li malajr inħataf minnu, u beda jqim bħal alla dak li kien bniedem mejjet, u ordna lil ta’ taħtu jqimuh b’ċerimonji u riti.

¹⁶Imbagħad maż-żmien din id-drawwa ħażina ssaħħet u saret bħal liġi;

¹⁷u b’ordni ta’ slaten bdiet tingħata qima lix-xbihat minquxa. Il-bnedmin, li ma setgħux iqimu lis-sultan f’wiċċu għax kien imbiegħed, ħażżu xbieha tal-wiċċ li ma kinux jaraw, u għamlu xbieha li tidher ta’ dak li riedu jqimu, bix-xewqa li jweġġħu s-sultan imbiegħed bħallikieku magħhom.

¹⁸U x-xewqa tal-ħaddiem tas-sengħa li jikseb tifħir, għenet biex xterdet dil-qima fejn ma kinitx magħrufa.

¹⁹Għax jista’ jkun li dan biex jogħġob lil sultan, ħadimha b’sengħa kbira biex jagħmilha xbieha mill-isbaħ.

²⁰U l-poplu, imsaħħar mis-sbuħija tax-xogħol, beda jqim bħal alla ’l dak li ftit qabel kien imweġġaħ bħala bniedem.

²¹Dan sewa ta’ xibka għall-ħajja tal-bnedmin, li, imjassrin mill-hemm u mis-setgħa tal-mexxej, taw lill-ħaġra u lill-għuda l-isem, li m’għandu jingħata lil ħadd.

²²Ma kienx biżżejjed għalihom li ħarġu mit-triq tat-tagħrif ta’ Alla, iżda, neqsin mill-għerf, bdew jgħixu fi ġlieda kbira ta’ injoranza, u dan il-ħażen kollu jsejħulu sliem.

²³Għalhekk infexxew fil-qtil ta’ wliedhom b’sagrifiċċji, jew fir-riti tal-misteri fil-moħbi, jew f’xalar ta’ mġienen waqt riti strambi.

²⁴La ħajjithom u lanqas iż-żwieġ ma ħarsu bis-safa, wieħed iqarraq bl-ieħor u joqtlu, jew ikiddu billi jeħodlu ’l martu.

²⁵Taħwid kull fejn tħares: demm u qtil, serq u qerq; korruzzjoni, tixwix u infedeltà, u ħalf fil-falz,

²⁶taħwid tat-tajbin, nuqqas ta’ gratitudni, tniġġis tal-erwieħ, żina kontra n-natura, taħwid fiż-żwieġ, adulterji u faħx.

²⁷Għax il-qima ta’ allat, li mhumiex ta’ min isemmihom, hi l-bidu, il-kawża u t-tmien ta’ kull ħażen.

²⁸Nies bħal dawn jew jiġġennu fix-xalar jew iħabbru l-gideb, jew jgħixu ħajja ħażina jew jaħilfu fil-falz bħallikieku xejn.

²⁹U, billi jafdaw f’allat bla ħajja, jaħilfu ħażin bla biża’ li tiġi fuqhom xi ħsara.

³⁰Iżda għal żewġ raġunijiet isir ħaqq minnhom: għax huma u jqimu l-allat, fehmuha ħażin fuq Alla, u għax kasbru t-tjieba u ħalfu fil-falz u l-qerq.

³¹Mhijiex is-setgħa ta’ dawk li jaħilfu bihom, iżda hu l-kastig li jistħoqq lill-midinbin; dan li dejjem jiġi fuq il-ħżiena wara ħtijiethom.