Read Maltese Bible with DC – IL-BIBBJA IL-KOTBA MQADDSA IL-KTIEB TAL-GĦERF 18 Bible Online

IL-KTIEB TAL-GĦERF 18 - Maltese Bible with DC – IL-BIBBJA IL-KOTBA MQADDSA bible

IL-KTIEB TAL-GĦERF 18

¹Imma għall-qaddisin tiegħek idda dawl kbir. U dawk li semgħu leħenhom bla ma rawhom, hienja sejħulhom, għax ma kinux qegħdin ibatu.

²Raddewlhom ħajr talli ma ħallsuhomx wara li ħaqruhom, u talbuhom maħfra talli ħaduha kontrihom.

³Għal dan int tajt lill-qaddisin tiegħek kolonna tan-nar, biex tmexxihom fi triq li ma kinux jafuha, u xemx li ma kellhiex tagħmlilhom ħsara fil-mixja glorjuża tagħhom.

⁴L-oħrajn kien ħaqqhom jibqgħu bla dawl u jingħalqu ġo ħabs mudlam, huma li żammew imjassra lil uliedek, li minnhom kellu jingħata lid-dinja d-dawl tal-Liġi li ma jintemm qatt.

⁵Huma riedu joqtlu t-trabi tal-qaddisin tiegħek; imma wieħed mit-trabi[21] tefgħuh barra, u ħeles mill-mewt. Bi tpattija int ħadtilhom il-kotra ta’ wliedhom, u għarraqthomlhom ilkoll f’salt wieħed f’baħar imqalleb.

⁶Dak il-lejl tħabbar minn qabel lil missirijietna, biex, wara li għarfu sewwa f’liema wegħdiet emmnu, aktar iqawwu qalbhom.

⁷Il-poplu tiegħek stenna l-ħelsien tal-ġusti, u l-qerda tal-għedewwa tagħhom,

⁸għax kif int ikkastigajt l-għedewwa tagħna, hekk sebbaħt lilna meta sejjaħtilna għalik.

⁹L-ulied twajba tal-ġusti offrew sagrifiċċju bil-moħbi, u lkoll fehma waħda qagħdu għal-Liġi ta’ Alla, li l-qaddisin tiegħek jaqsmu xorta bejniethom kemm il-ġid u kemm id-deni; għalhekk minn qabel għannew tifħir missirijiethom.

¹⁰Min-naħa tal-għedewwa kien jinstama’ għajjat li ma kienx jaqbel ma’ tagħhom, u kien jidwi l-ilfiq huma u jibku lil uliedhom.

¹¹L-istess kastig ħadu flimkien l-ilsir u sidu, u l-poplu u s-sultan batew l-istess.

¹²Ilkoll flimkien b’mewta waħda, kellhom mejtin bla għadd. Il-ħajjin ma kinux biżżejjed biex jidfnu l-mejtin, għax f’daqqa waħda nqerdu l-aħjar fost uliedhom.

¹³Għalkemm minħabba s-sħarijiet bl-ebda mod ma riedu jemmnu, mal-mewt ta’ wliedhom il-kbar kellhom jistqarru li l-poplu tiegħek kien bin Alla.

¹⁴Waqt li ħemda ta’ kwiet kienet taħkem fuq kollox, u l-lejl kien jaqbeż nofs il-mixja tiegħu,

¹⁵il-kelma setgħana tiegħek mit-tron tas-sultan tas-sema, niżlet bħal ġellied qalil, f’nofs dik l-art misħuta,

¹⁶bix-xabla misnuna tad-digriet tiegħek li dejjem sod. Kif waslet, kullimkien imliet bl-imwiet; kienet għadha tmiss mas-sema, hi u miexja fuq l-art.

¹⁷Imbagħad f’daqqa waħda werwruhom dehriet f’ħolm ikrah, u biża’ li qatt ma basruh ġie fuqhom;

¹⁸u, mitfugħin nofshom mejta, min ’il hawn u min ’il hemm, kienu jistqarru għaliex kienu qegħdin imutu,

¹⁹għax fil-ħolm li kien iħawwadhom dan għarfuh minn qabel, biex ma jmutux bla ma jkunu jafu għala kienu jbatu.

²⁰Fuq il-ġusti wkoll ġiet il-prova tal-mewt, meta fid-deżert waqa’ kastig fuq il-ġemgħa, iżda ma damitx wisq din il-korla ta’ Alla.

²¹Raġel bla ħtija[22] malajr deher għalihom, bil-mezzi f’idejh tal-ħidma tiegħu, it-talb u l-inċens tat-tpattija. Hu żamm il-korla tiegħek u waqqaf il-ħsara, u hekk wera li hu qaddej tiegħek.

²²Hu rebaħ il-ħruxija mhux bis-saħħa tal-ġisem jew bil-qawwa tal-armi; imma bi kliemu waqaf lil dak li kien isawwathom[23], billi fakkru fil-pattijiet li ħalef lil missirijiethom.

²³Meta l-iġsma waqgħu mejta gods wieħed fuq l-ieħor, waqaf fin-nofs u rażżan il-korla ta’ Alla, u għalqilha t-triq biex ma tilħaqx il-ħajjin.

²⁴Id-dinja kollha kienet fuq il-libsa twila tiegħu, ġieħ missirijietna[24] kien minqux fuq ħaġar f’erba’ fillieri, u l-kobor tiegħek kien fuq il-kuruna ta’ rasu.

²⁵Quddiemhom il-qerriedi ċieda, għax beża’ minnhom, kienet biżżejjed prova waħda biss tal-korla tiegħek.