Read Maltese Bible with DC – IL-BIBBJA IL-KOTBA MQADDSA IL-KTIEB TAL-GĦERF 19 Bible Online

IL-KTIEB TAL-GĦERF 19 - Maltese Bible with DC – IL-BIBBJA IL-KOTBA MQADDSA bible

IL-KTIEB TAL-GĦERF 19

¹Iżda fuq il-ħżiena niżel għadab bla ħniena sal-aħħar, għax Alla għaraf sa minn qabel x’kienu se jagħmlu:

²li, wara li ħallewhom jitilqu u ħeġġewhom ifittxu jmorru, kienu se jisgħob bihom u jmorru warajhom.

³Kienu għadhom iġorru l-mejtin tagħhom u jibkuhom ħdejn l-oqbra tagħhom, meta reġgħu ħasbuha ta’ boloh. Lil dawk li talbuhom bil-ħerqa biex jitilqu, għaddewhom b’maħrubin, u marru wrajhom.

⁴Kien id-destin li kien ħaqqhom li wassalhom sa hawn, u ġegħelhom jinsew x’kien ġralhom, biex iħallsu wkoll il-piena li kienet tonqos mill-kastig tagħhom.

⁵U waqt li l-poplu tiegħek temm mixja tal-għaġeb, huma ltaqgħu ma’ mewt li ma kinux jobsruha.

⁶Il-ħolqien kollu b’kulma fih sar mill-ġdid, biex waqt li joqgħod bil-qima għall-ordnijiet tiegħek, l-ebda ħsara ma ssir lil uliedek.

⁷Sħaba tefgħet dell fuq il-kamp tagħhom, art niexfa dehret ħierġa minn fejn qabel kien hemm l-ilma, triq bla tfixkil minn ġol-Baħar l-Aħmar, u art tħaddar flok ilmijiet qawwija.

⁸Minn hemm għadda l-poplu kollu taħt kenn idek, wara li ra għemejjel tal-għaġeb.

⁹Kienu qishom żwiemel jirgħu u ħrief jaqbżu waqt li kienu jfaħħruk, Mulej, li ħlisthom.

¹⁰Għax kienu għadhom jiftakru x’kien ġara fl-art fejn kienu; kif flok il-ferħ tal-bhejjem l-art tat in-nemus, u flok il-ħut ix-xmara mtliet bi żrinġijiet bla għadd.

¹¹Wara dan raw ukoll għasafar ta’ razza ġdida, meta, imxennqin għall-ikel, talbu ikel tajjeb;

¹²u, biex jaqtgħu xewqithom, ġiehom is-summien min-naħa tal-baħar.

¹³Imma fuq dawk il-midinbin ġew il-kastigi, wara li kienu mwissijin bil-qawwa tal-beraq; huma batew kif kien ħaqqhom, għal dnubiethom, għax urew mibegħda mill-eqqel lejn il-barranin.

¹⁴Kien hemm oħrajn li ma laqgħux il-barranin li żaruhom; imma dawk ijassru nies li kienu magħhom u għamlulhom il-ġid.

¹⁵U mhux dan biss; minn dawk sar ħaqq kbir tassew, għax żammew bħal għedewwa l-barranin.

¹⁶Imma dawn, wara li laqgħuhom bil-ferħ u tawhom sehem fl-istess drittijiet tagħhom, għakksuhom b’xogħlijiet iebsa.

¹⁷Dawk ġie wkoll fuqhom l-għama, bħal dawk li kienu wara bieb il-ġust, meta dalma tal-biża’ dawrithom, u kull wieħed beda jfittex fetħet biebu.

¹⁸L-elementi tad-dinja b’mod ieħor huma magħqudin bejniethom, bħall-kordi tal-arpa li minnhom joħorġu diversi melodiji, għalkemm kull waħda żżomm ir-ritmu tagħha. Dan jidher ċar jekk wieħed iħares lejn li ġara.

¹⁹Bhejjem tal-art inbidlu f’bhejjem tal-baħar, u dawk li jgħixu fl-ilma qabżu fuq l-art.

²⁰In-nar żamm fl-ilma l-qawwa tiegħu, u l-ilma nesa li jista’ jitfi.

²¹Il-fjammi mbagħad ma ħarqux il-ġisem ta’ bhejjem li jmutu u li għaddew minn ġo fihom; lanqas dewbu dak il-ħobż tas-sema, qisu silġ li malajr jinħall.

²²F’kollox, Mulej, kabbart u sebbaħt il-poplu tiegħek; ma ċħadtlu qatt l-għajnuna f’kull żmien u kullimkien!