Read Maltese Bible with DC – IL-BIBBJA IL-KOTBA MQADDSA IL-KTIEB TAL-GĦERF 5 Bible Online

IL-KTIEB TAL-GĦERF 5 - Maltese Bible with DC – IL-BIBBJA IL-KOTBA MQADDSA bible

IL-KTIEB TAL-GĦERF 5

¹Imbagħad il-ġust jieqaf kollu kuraġġ, quddiem dawk li għakksuh, u maqdru t-taħbit tiegħu.

²Kif jarawh, jitkexkxu u jitwerwru bil-biża’; jistagħġbu xħin jarawh salv, kif qatt ma basru.

³Kollhom sogħbiena, jitniehdu bin-niket ta’ qalbhom, u jgħidu bejniethom:

⁴“Dan hu dak, li aħna ħadnieh bid-daħk, u waqqajnieh għaċ-ċajt u żeblaħnieh. Kemm konna boloh! Ħajtu ħsibnieha ta’ ġenn, u bla ġieħ il-mewt tiegħu.

⁵Kif inhu qiegħed ma’ wlied Alla, u għandu postu mal-qaddisin?

⁶Mela aħna ħriġna mit-triq tas-sewwa, id-dawl tal-ġustizzja ma iddiex għalina, u x-xemx qatt ma telgħet għalina.

⁷Għejejna fi triqat il-ħażen u t-telfien, għaddejna mid-deżert bl-ebda mogħdija; imma triq il-Mulej ma għarafnihiex.

⁸Xi switilna l-kburija tagħna? U x’ħadna mill-għana u l-ftaħir tiegħu?

⁹Dan kollu bħal dell għadda, u bħal aħbar li ttir mar-riħ;

¹⁰bħal ġifen li jaqsam baħar imqalleb, u, meta jgħaddi, ma ssib ebda sinjal tiegħu, u lanqas radda tal-karina tiegħu fl-imwieġ;

¹¹jew bħal għasfur li jittajjar fl-ajru, ma ssibx il-linja tal-mixja tiegħu; b’rixu jolqot iż-żiffa ħafifa, jofroqha u jaqsamha bis-saħħa tal-ġwienaħ qawwija; imbagħad ma jħalli ebda sinjal mnejn għadda;

¹²jew bħal meta vleġġa lejn il-bersall tittajjar, tinferaq l-arja u malajr terġa’ tingħalaq, u ma tistax tagħraf it-triq mnejn għaddiet.

¹³Hekk ukoll aħna twelidna u malajr intemmejna, l-ebda sinjal ta’ virtù ma ħallejna, fil-ħażen tagħna nqridna.”

¹⁴Tassew, it-tama tal-ħżiena bħal trab imtajjar mar-riħ, bħal borra mkaxkra mir-riefnu, bħat-tifkira li tgħaddi ta’ mistieden għal jum wieħed.

¹⁵Imma l-ġusti jgħixu għal dejjem, fil-Mulej hu l-ħlas tagħhom; Alla l-għoli jżommhom fi ħsiebu.

¹⁶Għalhekk jieħdu l-ġmiel tas-slaten, u l-kuruna sabiħa minn id il-Mulej; hu jħarishom b’idu l-leminija, u bi driegħu jkenninhom.

¹⁷Jilbes il-kurazza tal-ħeġġa tiegħu, u jarma l-eżerċtu tal-ħlejjaq kontra l-għedewwa,

¹⁸u jqiegħed fuq sidru l-kurazza tal-ġustizzja, u fuq rasu l-elmu tal-ħaqq bla qerq;

¹⁹jieħu t-tarka tal-qdusija li qatt ma tintrebaħ,

²⁰u jsinn is-sejf tal-qilla mgħaddba; u d-dinja tissieħeb miegħu fil-ġlieda kontra l-boloh.

²¹Vleġeġ tan-nar joħorġu u jtiru dritti, mis-sħab bħal minn qaws miġbud sewwa, għal fuq il-bersall jaħarbu.

²²Silġ kollu qilla bħal minn żbandola jitwaddab. L-imwieġ tal-baħar iqumu għalihom, u x-xmajjar bla ħniena jkaxkruhom.

²³Riħ qawwi jqum kontrihom, u riefnu bħal tiben itajjarhom. Hekk iħarbat il-ħażen l-art kollha, għemil il-ħażen iġarraf it-tronijiet setgħana.