Read Maltese Bible with DC – IL-BIBBJA IL-KOTBA MQADDSA IL-KTIEB TAL-GĦERF 6 Bible Online

IL-KTIEB TAL-GĦERF 6 - Maltese Bible with DC – IL-BIBBJA IL-KOTBA MQADDSA bible

IL-KTIEB TAL-GĦERF 6

¹Isimgħu mela, slaten, u ifhmu; tgħallmu, intom li taħkmu sa truf l-art;

²agħtu widen, mexxejja tal-kotra, li tiftaħru bl-għadd tal-ġnus tagħkom!

³Hu l-Mulej li takom is-setgħa, mingħand l-Għoli l-qawwa tagħkom; hu jgħarbel l-għemejjel tagħkom, u jifli bir-reqqa l-fehmiet tagħkom.

⁴Għalkemm intom qaddejja ta’ saltnatu, ma qtajtux il-ħaqq sewwa, u ma żammejtux mal-Liġi[9]; anqas ma mxejtu skont ir-rieda ta’ Alla.

⁵Bil-biża’ u bil-ħeffa se jiġi jżurkom, għax bl-aħrax jiġġudika ’l min hu fl-għoli.

⁶Iż-żgħir isib mogħdrija u ħniena, imma l-kbir bil-kbir jaqlagħha.

⁷Għax sid kulħadd ma jħarisx lejn l-uċuħ, lanqas ma jibża’ mill-kobor ta’ xi ħadd. Iż-żgħir u l-kbir għamilhom hu, u xorta waħda jieħu ħsiebhom ilkoll;

⁸imma s-setgħana jgħarbilhom bir-reqqa.

⁹Għalikom mela, mexxejja, dan kliemi, biex titgħallmu l-għerf u ma taqgħux.

¹⁰Għax dawk li jħarsu l-kmandamenti mqaddsa bil-qdusija, jingħaddu mal-qaddisin; u min tgħallimhom ikollu lilhom jaqbżu għalih.

¹¹Ħa jkollkom mela xewqa għal kliemi, ixxennqu għalihom u titgħallmuhom.

¹²L-għerf jiddi, bla qatt ma jnemnem, malajr jagħrfuh dawk li jħobbuh, u jsibuh dawk li jfittxuh.

¹³Hu jħabrek biex jidher lil dawk li jixtiquh.

¹⁴Min ibakkar ifittxu, ma jitħabatx, għax ħdejn biebu bilqiegħda jsibu.

¹⁵L-aqwa tal-għaqal hu li taħseb fl-għerf, u min jishar għalih malajr jeħles mill-inkwiet.

¹⁶L-għerf idur u jfittex ’il dawk li jixirqulu, kollu ħlewwa jidhrilhom fit-triq, u jiltaqa’ magħhom f’kull ħsieb tagħhom.

¹⁷Il-bidu tal-għerf hi xewqa mħeġġa għat-tagħlim; u l-ħerqa tat-tagħlim hi l-imħabba tiegħu.

¹⁸Din l-imħabba hi l-ħarsien tal-liġijiet tiegħu, u l-ħarsien tal-liġijiet tiegħu jġib l-immortalità;

¹⁹u l-immortalità tqarreb lejn Alla.

²⁰Hekk ix-xewqa għall-għerf twassal għas-saltna.

²¹Intom mela, mexxejja tal-poplu, jekk jogħġbukom it-tronijiet u x-xettri, weġġħu l-għerf, biex issaltnu għal dejjem.

²²X’inhu l-għerf u mnejn ġie, jien se ngħidilkom; xejn mistur m’jien se naħbilkom. Se nibda mill-bidu tat-tnissil tiegħu, inqiegħed fid-dieher it-tagħrif tiegħu, ma nħalli xejn barra mis-sewwa.

²³Ma rridx miegħi l-għira qerrieda għax din ma tistax tissieħeb mal-għerf.

²⁴Għadd kbir ta’ għorrief hu s-saħħa tad-dinja, u s-sultan għaqli jżomm fis-sod il-poplu tiegħu.

²⁵Mela tgħallmu kliemi għall-ġid tagħkom.