Read Maltese Bible with DC – IL-BIBBJA IL-KOTBA MQADDSA BIN SIRAK 18 Bible Online

BIN SIRAK 18 - Maltese Bible with DC – IL-BIBBJA IL-KOTBA MQADDSA bible

BIN SIRAK 18

¹Il-kobor ta’ Alla Dak li jgħix għal dejjem ħalaq kollu kemm huwa l-univers.

²Il-Mulej biss hu magħdud b’ġust, u m’hemm ħadd ieħor ħliefu.

³Irieġi d-dinja fil-keffa ta’ idu, u kollox joqgħod għar-rieda tiegħu, għax hu s-sultan ta’ kollox, u bil-qawwa tiegħu jifred fosthom, is-sagru mill-profan.

⁴Ma ta lil ħadd ifisser dak li għamel; u min se jifhem l-għemejjel kbar tiegħu?

⁵Il-qawwa kbira tiegħu min jista’ jqisha? U min se jirrakkonta ħnientu?

⁶M’hemmx x’wieħed inaqqas u lanqas xi jżid, u m’hemmx min jifhem għeġubijiet il-Mulej.

⁷Xħin bniedem jasal fit-tmiem, ikun għadu fil-bidu; u meta jieqaf, jibqa’ mifxul. Ix-xejn tal-bniedem

⁸X’inhu l-bniedem u x’inhi l-ħtieġa tiegħu? X’inhu t-tajjeb u x’inhu l-ħażin tiegħu?

⁹Għadd jiem il-bniedem hu kbir jekk ikun ta’ mitt sena.

¹⁰Bħal qatra ilma mill-baħar u traba mir-ramel, hekk huma ftit snin ħdejn il-jum ta’ dejjem.

¹¹Għalhekk jistabar bihom il-Mulej, u jsawwab fuqhom ħnientu.

¹²Jara u jagħraf li se jispiċċaw ħażin, u għalhekk ikattar il-maħfra tiegħu.

¹³Il-ħniena tal-bniedem hi ma’ ġaru, imma l-ħniena tal-Mulej hi ma’ kull min hu ħaj; iċanfar, iħarreġ, u jgħallem, u jreġġagħhom lura bħal ragħaj il-merħla tiegħu.

¹⁴Tiġih ħasra minn dawk li jilqgħu twiddibu, u minn dawk li jfittxu l-ġudizzji tiegħu. Kif wieħed għandu jagħti

¹⁵Ibni, iċċanfarx inti u tagħmel il-ġid, u meta tagħti tweġġax b’ilsienek.

¹⁶Mhux in-nida ttaffi l-għomma? Hekk il-kelma hi aqwa mill-għotja.

¹⁷Il-kelma mhijiex aħjar minn għotja tajba? Imma t-tnejn issibhom għand bniedem qalbu tajba.

¹⁸L-iblah hu qalbu ħażina u jmaqdar, u l-għotja ta’ min jagħtik kontra qalbu tweġġagħlek għajnejk. Irrifletti u aħseb minn qabel

¹⁹Tgħallem qabel titkellem, u ħu ħsieb saħħtek qabel timrad.

²⁰Qabel il-ħaqq stħarreġ sewwa lilek innifsek, u fis-siegħa taż-żjara ssib il-maħfra.

²¹Qabel timrad ċekken lilek innifsek, u meta tonqos uri li jisgħob bik.

²²Tintrabatx hekk li ma tkunx tista’ żżomm wegħda f’waqtha, u tistenniex il-mewt biex teħles minnha.

²³Qabel tagħmel wegħda ħejji ruħek, u tkunx bħal bniedem li jġarrab il-Mulej.

²⁴Ftakar fil-qilla tal-aħħar jum; u fi żmien il-ħlas, meta Alla jdawwar wiċċu.

²⁵Ftakar fi żmien il-ġuħ meta għandek biex tixba’, u fil-faqar u n-nuqqas f’jiem il-ġid.

²⁶Iż-żmien għaddej minn filgħodu sa filgħaxija, u kollox jgħaddi malajr quddiem il-Mulej.

²⁷Bniedem għaqli joqgħod b’seba’ għajnejn f’kollox, u f’jiem id-dnub jieħu ħsieb li ma jiżbaljax.

²⁸Min għandu s-sens jagħraf l-għerf, u jrodd tifħir lil min isibu.

²⁹Dawk li jifhmu l-qwiel, huma wkoll isiru għorrief, u jkunu għajn ta’ proverbji għaqlija. It-trażżin

³⁰Tħallix xewqatek jiġbduk warajhom, u rażżanhom il-ġibdiet tiegħek.

³¹Jekk tintelaq għal kulma tixtieq qalbek, jiddieħku bik l-għedewwa tiegħek.

³²Tixxalax f’ħafna lussu, li ma tiftaqarx bl-ispejjeż tiegħu.

³³Tiddejjinx u tiftaqarx biex tixxala, meta ma għandek xejn fil-ħorġa.