Read Maltese Bible with DC – IL-BIBBJA IL-KOTBA MQADDSA BIN SIRAK 2 Bible Online

BIN SIRAK 2 - Maltese Bible with DC – IL-BIBBJA IL-KOTBA MQADDSA bible

BIN SIRAK 2

¹Il-biża’ tal-Mulej waqt il-prova Ibni, jekk tiġi biex taqdi lill-Mulej ħejji ruħek għat-tiġrib.

²Kun sinċier f’qalbek u żomm sħiħ, biex ma tinfixilx fi żmien l-għawġ.

³Ingħaqad miegħu u titilqux, u tikber fil-ġieħ fi tmiem ħajtek.

⁴Kulma jiġi fuqek ilqgħu, u żomm sħiħ fit-tibdil li jumiljak.

⁵Għax id-deheb jippruvawh fin-nar, u n-nies magħżula fil-forn tal-umiljazzjoni.

⁶Afda fil-Mulej u jieqaf miegħek, żomm triqatek dritti u ittama fih.

⁷Intom li tibżgħu mill-Mulej stennew ħnientu, u toħorġux mit-triq li ma tmorrux taqgħu.

⁸Intom li tibżgħu mill-Mulej afdaw fih, u ma jonqoskomx il-ħlas tagħkom.

⁹Intom li tibżgħu mill-Mulej, ittamaw fi ħwejjeġ tajba, fl-hena ta’ dejjem u fil-ħniena.

¹⁰Ħarsu lejn il-ġenerazzjonijiet ta’ dari u araw: min qatt ittama fil-Mulej u kellu għax jistħi? Jew min żamm fil-biża’ tiegħu, u l-Mulej ħallieh waħdu? Jew min sejjaħlu, u l-Mulej ma tax kasu?

¹¹Għax il-Mulej tiġih ħasra u jħenn, jaħfer id-dnubiet u jsalva fi żmien l-għawġ.

¹²Ħażin għalihom ta’ qalbhom maqtugħa u ta’ idejhom mitluqa, u għall-midneb li jgħix ħajja doppja.

¹³Ħażin għalikom li qtajtu qalbkom għax bla fidi; b’hekk ma jkollux fejn jistkenn.

¹⁴Ħażin għalikom li tliftu s-sabar! X’se tagħmlu meta jistħarriġkom il-Mulej?

¹⁵Dawk li jibżgħu mill-Mulej ma jiksrux kelmtu, u dawk li jħobbuh iħarsu triqatu.

¹⁶Dawk li jħobbu l-Mulej ifittxu li jogħġbuh, u dawk li jħobbuh huma mimlija bil-Liġi tiegħu.

¹⁷Dawk li jibżgħu mill-Mulej iħejju ruħhom, u quddiemu jċekknu ruħhom.

¹⁸Nintelqu f’idejn il-Mulej u mhux f’idejn il-bniedem, għax bħalma hu l-kobor tiegħu, hekk ukoll il-ħniena tiegħu.