Read Maltese Bible with DC – IL-BIBBJA IL-KOTBA MQADDSA BIN SIRAK 23 Bible Online

BIN SIRAK 23 - Maltese Bible with DC – IL-BIBBJA IL-KOTBA MQADDSA bible

BIN SIRAK 23

¹Talba Mulej, missier ħajti u sidha, titlaqnix għar-rieda tagħhom, u tħallinix naqa’ minħabba fihom.

²Min se joqgħod b’sawt ma’ ħsibijieti, u bid-dixxiplina tal-għerf ma’ qalbi, biex ma jeħlishilix fin-nuqqas tiegħi, u ma jagħlaqx għajnejh għad-dnubiet tiegħi?

³Li ma jiżdidux l-iżbalji tiegħi u jitkattru d-dnubiet tiegħi, u naqa’ quddiem dawk li jeħduha miegħi, u jifraħ l-għadu tiegħi minħabba fija!

⁴Mulej, missier u Alla ta’ ħajti, tagħtinix ħarsa merfugħa ’l fuq,

⁵u warrab minni kull ġibda ħażina;

⁶tħallix li jaħtfuni kilba għall-ikel u xewqat tal-ġisem, u titlaqnix fil-ħakma ta’ xewqat faħxija. Il-ħalf

⁷Uliedi, isimgħu tagħlim dwar kliem fommkom, u min iħarsu ma jinqabadx.

⁸Il-midneb jaħkmuh xufftejh, min jgħajjar u jitkabbar jitfixkel bihom.

⁹Iddarrix fommok fil-ħalf, u tidrax issemmi isem il-Qaddis;

¹⁰bħalma lsir mistħarreġ taħt is-swat il-ħin kollu jibqagħlu fuqu t-tbenġil, ma jissaffiex minn dnubietu.

¹¹Bniedem li l-ħin kollu jaħlef jimtela bil-ħażen, u s-swat ma jwarrabx minn daru. Jekk jonqos, jibqa’ fuqu dnubu, jekk imbagħad ma jagħtix kas, darb’oħra jidneb aktar; jekk jaħlef fil-vojt ma jitqiesx bla ħtija, u timtela daru bil-hemm. Il-kliem ħażin

¹²Hawn kliem li hu mqabbel mal-mewt; jalla ma jinstabx f’wirt Ġakobb! Għax in-nies twajba jżommu dan kollu ’l bogħod minnhom, u ma jitmegħkux fid-dnubiet.

¹³Iddarrix fommok fil-ħmieġ ta’ kliem baxx, għax f’dan hemm kliem ta’ dnub.

¹⁴Ftakar f’missierek u ommok meta toqgħod bilqiegħda mal-kbarat, li ma tmurx tintilef meta tkun quddiemhom, u tiblieh fl-imġiba tiegħek; imbagħad tixtieq li ma twelidtx, u tisħet jum twelidek.

¹⁵Bniedem imdorri jgħid kliem insolenti ma jitgħallem qatt tul il-jiem kollha ta’ ħajtu. L-inċest u l-adulterju

¹⁶Tnejn min-nies ikattru d-dnubiet, u t-tielet iġib fuqu l-għadab ta’ Alla.

¹⁷Bniedem b’passjoni taħraq daqs nar imqabbad, li ma tintefiex qabel ma jkun qata’ xewqtu; bniedem li jiżni ma’ niesu ma jiqafx qabel ma n-nar jaħarqu għalkollox. Il-bniedem żieni kull ħobż jiġih tajjeb[30], u ma jegħjiex qabel ma jmut.

¹⁸Min jonqos kontra l-wegħdiet taż-żwieġ[31] jgħid bejnu u bejn ruħu: “Min se jarani? Id-dlam jinfirex dawramejt madwari u l-ħitan jostruni, u ħadd ma jarani. Għaliex għandi nibża’? Id-dnubiet tiegħi l-Għoli ma jiftakarhomx.”

¹⁹Il-biża’ tiegħu huma għajnejn il-bnedmin, imma ma jafx li għajnejn il-Mulej jiddu għaxart elef darba iktar mix-xemx; iħarsu fuq it-triqat kollha tal-bnedmin, u jiflu saħansitra l-inħawi moħbija.

²⁰Qabel ma nħalaq kollox kien magħruf minnu; hekk ukoll wara li tlesta.

²¹Bniedem bħal dan jitħallas fil-pjazez tal-ibliet[32], u jinqabad fejn lanqas biss jobsor. L-adultera

²²Hekk ukoll il-mara li tħalli ’l żewġha u ġġiblu werriet minn ħaddieħor,

²³għax l-ewwel nett tkun kisret il-Liġi tal-Għoli; it-tieni tkun naqset lil żewġha; it-tielet tkun għamlet adulterju bħal mara żienja, u ġiebet ulied minn raġel ieħor.

²⁴Din tinġieb quddiem il-ġemgħa[33] u jsir stħarriġ dwar uliedha.

²⁵Uliedha ma jxenxlux għeruq, u l-friegħi tagħha ma jagħmlux frott.

²⁶Tħalli warajha tifkira misħuta, u l-għajb tagħha ma jitħassrilhiex.

²⁷U dawk li jibqgħu warajha jsiru jafu li xejn mhu aqwa mill-biża’ tal-Mulej, u xejn mhu itjeb milli toqgħod għal-Liġi tal-Mulej.