Read Maltese Bible with DC – IL-BIBBJA IL-KOTBA MQADDSA BIN SIRAK 24 Bible Online

BIN SIRAK 24 - Maltese Bible with DC – IL-BIBBJA IL-KOTBA MQADDSA bible

BIN SIRAK 24

¹Id-diskors tal-għerf L-għerf ifaħħar lilu nnifsu, u jiftaħar f’nofs il-poplu tiegħu.

²Jiftaħ fommu fil-ġemgħa tal-Għoli, u jiftaħar quddiem qawwietu.

³“Jien ħriġt minn fomm l-Għoli u għattejt l-art bħan-nida.

⁴Tellajt fl-għoli l-għarix tiegħi, u t-tron tiegħi kien kolonna sħab.

⁵Waħdi dort id-dawra ta’ fuq is-smewwiet, u mxejt f’qiegħ l-abbiss.

⁶Ħadt f’idejja mewġ il-baħar u l-art kollha, u kull poplu u ġens.

⁷Fost dawn kollha fittixt fejn nistrieħ u f’art min immur noqgħod.

⁸Imbagħad il-Ħallieq ta’ kollox tani ordni, u dak li ħalaqni għażel post għall-għarix tiegħi, u qalli: “Tella’ l-għarix tiegħek f’Ġakobb, u iret sehmek f’Iżrael.”

⁹Qabel kull żmien, fil-bidu, ħalaqni, u sal-aħħar taż-żmien ma niġix nieqes.

¹⁰Għamiltha ta’ qaddej quddiemu fl-Għarix Imqaddes, u hekk tqigħedt fis-sod f’Sijon.

¹¹Hekk ukoll qegħedni nistrieħ fil-belt maħbuba, u s-setgħa tiegħi kienet fuq Ġerusalemm.

¹²U xenxilt għeruqi f’poplu ta’ ġieħ, f’sehem il-Mulej, fil-wirt tiegħu.

¹³Għolejt bħal ċedru tal-Libanu, u bħal ċipressa fuq l-għoljiet tal-Ħermon.

¹⁴Għolejt bħal palma f’Għajn-geddi, u bħal xtieli tal-ward f’Ġeriko; bħal żebbuġa l-ġmiel tagħha f’wita, u bħal dolf għolejt.

¹⁵Bħall-kannella[34] u l-akaċja rmejt il-fwejjaħ, bħall-mirra mill-aħjar sawwabt il-fwieħa, bħall-galbanu, l-oniċi u l-istoraċ, u bħad-duħħan tal-inċens fl-għarix.

¹⁶Jien bħal terebint frixt il-friegħi tiegħi, u l-friegħi tiegħi huma friegħi ta’ min jagħtihom ġieħ u jitgħaxxaq bihom.

¹⁷Jien bħal dielja tarmi żahar li jiġbdek, u n-nwar tiegħu jagħmel frott ta’ glorja u ġid.

¹⁸Jien omm[35] l-imħabba safja, il-biża’ u l-għerf u t-tama qaddisa.

¹⁹Ersqu lejja intom li tixtiquni, u mtlew bil-frott tiegħi.

²⁰Għax tifkirti oħla mill-għasel, u sehmi minn xehda għasel.

²¹Min jiekol minni jieħdu l-ġuħ[36] għal aktar, u min jixrob minni jieħdu l-għatx għal aktar.

²²Min jisma’ minni ma jkollux għax jistħi, u dawk li jaħdmu bija ma jidinbux. L-għerf u l-Liġi

²³Dan kollu hu ktieb il-patt ta’ Alla[37] l-Għoli, il-Liġi li ordnalna nħarsu Mosè, il-wirt tal-ġemgħat ta’ Ġakobb.

²⁴Tiqafx tissaħħaħ[38] fil-Mulej; ingħaqad miegħu biex jagħtik is-saħħa; il-Mulej li jista’ kollox, hu waħdu Alla, u m’hemmx salvatur ħliefu.

²⁵Tfawwar il-bniedem bl-għerf bħall-Pison[39], jew bħat-Tigri f’jiem il-frott tal-bikri.

²⁶Timlieh bid-dehen bħall-Ewfrat, u bħall-Ġordan f’jiem il-ħsad.

²⁷It-tagħlim jagħmlu jiddi bħad-dawl, u bħall-Giħon f’jiem ġbir il-frott.

²⁸Kif l-ewwel bniedem ma kienx jafha sewwa, hekk ukoll l-aħħar wieħed ma fehemhiex għalkollox,

²⁹għax ħsibijietha kotrana iktar mill-baħar, u fehmietha iktar fondi mill-abbiss. L-awtur

³⁰U jien bħal kanal ħiereġ minn xmara, u bħal mogħdija ilma dieħla fi ġnien.

³¹Għedt: “Insaqqi l-masġar tiegħi, u nisqi kull roqgħa fil-ġnien tiegħi,” u ara, il-kanal tiegħi sar xmara, u x-xmara tiegħi saret baħar.

³²It-tagħlim għad nagħmlu jiddi daqs it-tbexbix, u nwassallu ’l bogħod id-dawl tiegħu.

³³It-tagħlim għad insawbu bħal profezija, u nħallih għal kull nisel tul iż-żminijiet.

³⁴Araw li ma tħabatx għalija biss, imma għal kull min ifittex it-tagħlim.