Read Maltese Bible with DC – IL-BIBBJA IL-KOTBA MQADDSA BIN SIRAK 26 Bible Online

BIN SIRAK 26 - Maltese Bible with DC – IL-BIBBJA IL-KOTBA MQADDSA bible

BIN SIRAK 26

¹Hieni r-raġel ta’ mara tajba, l-għadd ta’ jiemu jkun għal darb’oħra aktar.

²Mara qalbiena tferraħ lil żewġha, u hu jtemm żmienu fis-sliem.

³Mara tajba hi xorti tajba, tingħata b’sehem lil min jibża’ mill-Mulej.

⁴Għani jew fqir, għandu hena f’qalbu, u dejjem wiċċu mbissem.

⁵Tlieta huma l-ħwejjeġ li qalbi tibża’ minnhom, u r-raba’ tkexkixni: qlajja’ f’belt, ġemgħa ta’ kotra nies, u xili qarrieq - dawn kollha agħar mill-mewt.

⁶Niket u għali mara għajjura għal oħra, u swat bl-ilsien daqs dawn kollha.

⁷Mara ħażina bħal madmad jiċċaqlaq fuq għonq gendus, min ifittex li jaħkimha qisu bħal wieħed qabad b’idejh skorpjun.

⁸Għadab kbir mara fis-sakra, u l-għajb tagħha lanqas biss tgħattih.

⁹Iż-żina ta’ mara jidher f’ħarsitha xewqana, u tingħaraf minn għajnejha.

¹⁰Għasses tajjeb fuq bint rasha iebsa, li ma tmurx issib il-ħelsien u tinqeda bih.

¹¹Għasses għal għajnejha bla mistħija, u tistagħġibx jekk tonqsok.

¹²Bħalma wieħed bil-għatx fi triqtu jiftaħ ħalqu u jixrob minn kull ilma qrib tiegħu, hekk hi toqgħod bilqiegħda quddiem kull arblu, u l-barżakka tagħha tiftaħ għal kull vleġġa.

¹³Mara ta’ ħlewwa tferraħ lil żewġha, u s-sengħa tagħha ssaħħaħlu għadmu.

¹⁴Għotja tal-Mulej mara siekta, u ruħ imrobbija tajjeb m’hawnx bħalha.

¹⁵Mara mistħija ġġib barka fuq oħra, u m’hawnx prezzha ruħ irżina.

¹⁶Bħal xemx tielgħa fl-għoli tas-smewwiet, hekk hu l-ġmiel ta’ mara sewwa, f’darha miżmuma bl-ordni.

¹⁷Bħal musbieħ jiddi fuq il-kandelabru sagru[43], hekk hu wiċċ sabiħ fuq figura nobbli.

¹⁸Bħal pilastri mdiehba fuq bażi tal-fidda, hekk huma riġlejn sbieħ fuq għerieqeb sodi.

¹⁹Ibni, żomm b’saħħtu fjur żgħożitek, u tagħtix lill-barranin saħħtek.

²⁰Fittex art għammiela fil-wita kollha, u iżra’ ż-żerriegħa tiegħek bil-fiduċja fi tnissilek nobbli.

²¹U hekk in-nisel tiegħek jibqa’, u jkun kbir minħabba l-fiduċja li jkollu f’nobbiltu.

²²Mara tinkera jistmawha daqs beżqa, imma mara miżżewġa torri għall-mewt għal dawk li jfittxuha.

²³Mara ħażina tingħata b’sehem lill-midneb, imma waħda twajba tingħata lil min jibża’ mill-Mulej.

²⁴Mara bla mistħija tkasbar ġieħha l-ħin kollu, imma bint miġbura tistħi saħansitra minn żewġha.

²⁵Mara sfaċċata sa titqies daqs kelb, imma mara mistħija tibża’ mill-Mulej.

²⁶Mara li tweġġaħ lil żewġha, kulħadd iqisha mara ta’ għerf, imma waħda li ma tagħtihx ġieħ, fi kburitha jqisuha b’mara ħażina. Hieni r-raġel ta’ mara sewwa, għax l-għadd ta’ sninu joktru għal darb’oħra aktar.

²⁷Mara tgħajjat u ttaqtaq ħafna bħal trumbetta tal-gwerra li tfakkar il-ħarba; u kull raġel f’qagħdiet bħal dawn jgħaddi ħajtu f’taqlib ta’ gwerra. Ħwejjeġ li jnikktu

²⁸Minħabba tnejn titnikket qalbi, u minħabba t-tielet nimtela bl-għadab: li raġel qalbieni jinfena mill-għaks; li rġiel għaqlin jitwarrbu b’diżunur; li bniedem iħalli s-sewwa għad-dnub; jalla bniedem bħal dan jitilqu għax-xabla l-Mulej! In-negozju

²⁹Iebsa għan-neguzjant li jaħrab il-ħażen, u għall-bejjiegħ li ma jaqax fid-dnub.